Aizawl: August 5, 2023 tlai khan All India Congress Committee (AICC) hruaitu, Sonia Gandhi leh Rahul Gandhi ten New Delhi-a an chenna in, 10 Janpath-ah India ram Congress party rorelna sang, Congress Steering Committee member Lal Thanhawla chu lengah sawmin an inkawm a, Manipur-a Zofate tawrhna titawp tura chak zawka hmalak dan tur an sawi ho.
Lal Thanhawla chuan Manipur-ah BJP sorkar leh central-a Modi kaihhruai BJP avanga Zofate tawrhna rei lutuk titawp tura a rang lama hmalakna neih leh thuai a tul tih sawiin, an nunphung pangngaia awm leh tur pawha hun a duh rei tawh tur zia te leh chutiang nunphung pangngaia nun an la hlat zia te a sawi a. Zofate chunga raw-va taka BJP sorkar a chet dan chungchang tihtawp thuai a nih dan tur te an sawi.
Kumin 2023 MLA inthlanah Lalsawta kaihhruai Congress party-in Mizoramah sorkarna an chan ngei a ring, tih sawiin Lal Thanhawla chuan, “Chumi tur chuan Mizorama mi rinhlawh mi tha tak tak kan beisei phak loh ten Congress an zawm a, tunah pawh mi tha, ram hruai tura mipuiin an duhten an zawm leh thuai dawn a. Heng mite hian Pu Lalsawta hovin Mizoram mipui beisei leh an tuihalna sorkar tha chu an pe ang,” a ti.
Mizoramah Congress a sorkar theihna turin Gandhi-a chu a tul anga an chhungkua pawha che chhuak turin a ngen.
Gandhi-a pawhin Mizoram mipui chu a pa atang tawhin an chhungkaw ngainat an ni a. Mizoram mipuite mamawhna anga chet chu an tan thil tih châkawm tak a ni reng ang, a ti a, a tul ang zela Mizoram tana chet zel an tum tih Lal Thanhawla hi a lo hrilh.
MPCC President Lalsawta hovin July 4, 2023 khan AICC President Mallikargun Kharge leh Gandhi te chuan Manipur-a Zofate tawrhna chungchang leh India rama Kristiante chunga hleilenna chungchanga hmalak dan tur hi AICC Office, New Delhi-ah an lo sawi ho tawh bawk.