Manipur-a Zofa pawl hrang hrangte khaikhawmtu, Indigenous Tribal Leaders’ Forum (ITLF) hruaitute leh Union Home Minister Amit Shah te chu vawiinah Delhi-ah an inhmu dawn.
MNF hruaitute hnen atanga thu dawn danin inrinni khan Union Home Minister Shah chuan Manipur-a ITLF hruaitute chu Delhi-ah inbiakna neihpui a duh thu hriattirin ITLF hruaitute pawh nilengin an thukhawm nghal a. Mizoram Chief Minister Zoramthanga thurawn an lak hnuah Thawhtanni hian inbiakna neihpui an remti ta a ni.
ITLF hian union home minister-in a sawmna chungchangah uluk taka ngaihtuahna sengin venthawn ruk pawh an nei a. Thutlukna khirhkhan siam ngaih hunah leh an lo rawn thin, ‘Pa’ bera an neih, Zoramthanga chu rawn hmasa lehin, “Home minister meuhin a rawn sawm che u chuan kal ngei a tha e, kal loh ngawt chu a tha lo vang; hmaichhanah ngei engkim sawipuina hun tha tak a ni,” tiin chief minister hian thurawn a lo pe a ni.
Chief minister thurawn angin ITLF hruaitute chuan Union Home Minister Shah chu hmuh an remti a. Thawhtanni hian Delhi-ah an inbe dawn ta a ni. ITLF hruaitute hian nimin khan Manipur chhuahsanin Delhi an pan hman beisei a ni.
Zoramthanga chuan a Instagram account-ah he thu hi sawiin Union Home Minister Shah hova ITLF hruaituten inbiakna an neih tur hi lawmawm a tih thu a sawi a. Boruak muanawm tak hnuaiah inbiakna tha tak an neih ngei pawh a beisei tlat thu leh duhsakna sang ber a hlan thu a tar lang bawk a ni.