Aizawl: Mizoram Excise & Narcotics department leh police-in kumin thla sarih chhunga a hran ve vea heroin an man chu kg. 95 leh gram 683 a tling tawh a, kum danga kum tluana an man thin aiin a tam tawh.
Excise & Narcotics department hnathawkte chuan January atanga July thla chhungin heroin hi kg. 52 leh gram 854 an man a. Police chuan hemi hun chhung vek hian heroin kg. 42 leh gram 829 an man bawk a ni.
February, 2021-a Myanmar sipaiten sorkarna an chhuh luih hnu khan a bik takin Mizoram dep Chin state-ah sorkarin awmzia a nei thei lo va. Hei vang hian Myanmar atanga Mizoram leh Manipur-a ruihhlo tawlh a pung hluai a. Tun hnaia Manipur-a buaina avangin Myanmar ramri khar a ni a. Manipur-a kal tur tam tak Mizorama an tawlh luh avangin ruihhlo lut hi a pung zual niin he lam buaipuitute chuan an sawi.
Mizoram kaltlanga ruihhlo lut tam ber hi state pawna hralh tura ruahman a ni chungin eng emaw zat a tangkhang a. Chumi vang chuan Mizoramah naupang lam ruihhlo khawih thar an tam niin thuneitute chuan an sawi.