Law & Judicial Minister T.J. Lalnuntluanga chuan Zirtawpni khan Arjun Ram Meghwal, Union Minister of State (Independent) Charge, Ministry of Law and Justice chu Delhi-a a chenna inah a kawm a, Mizoram mamawh hrang hrangte a thlen.
An inkawnnaah hian T.J. Lalnuntluanga chuan Mizoram chhunga Court infrastructure tih changtlung dan tur chungchang te, Mizoramin litigation lama hmasawnna nasa tak a neih thu leh Court changtlung tha a mamawh thu te, fund awm ang angte pawh Court tihchangtlun kawnga state-in bul a tan lai a nih avangin pek tam deuh a mamawh thu leh Lunglei leh district thar pathum tana Court building sak thuai a nih theih nan fund pe chhuak thuai turin a ngen.
Heng bakah hian T.J. Lalnuntluanga chuan, Champhai Judicial District Court building sak tur, Guwahati High Court pawhin Court building drawing a pawmpui vek tawh chu sak tan vat a nih theih nan CSS for Development of Infrastructure Facilities for the Judiciary hnuaia fund pe chhuak thuai turin a ngen bawk.
Union Law and Justice Minister Arjun Ram Meghwal chuan Minister T.J. Lalnuntluanga thil thlente chu a rang lama lo tihfel a tum tur thu a hrilh a ni.