Premier League champion Manchester City in an tlarhnung an tichak a, Euro maktaduai 90 in Croatia centre-back Josko Gvardiol chu an lalut.
Gvardiol hian kum nga contract Etihad Stadium-ah hian a ziak a, a man hi Pound in maktaduai 77 a ni a, kum 2019 a Manchester United in Leicester City atanga Harry Maguire an leina Pound maktaduai 80 chu pha lo chiahin khawvela defender manto ber dawttu a ni.
Kum 21 mi Gvardiol hiankum 2021 a an ram club Dinamo Zagreb atanga RB Leipzig a zawm hnuah Germany a season hnih a hman chhungin hma a sawn hle a, khawvela centre-half tha ber zingah an invawrh thei.
“England-ah engtikni ah emaw la inkhelh ve hi ka suangtuah fo thin. Tunah Manchester City hnuaiah ka ti hlawhtling thei tur hi ka lawm a, an season hman zawh tak chiah thlir phei chuan ka tan thil ropui tak a ni.” tiin Gvardiol chuan a sawi.
Croatia tana vawi 21 inkhel tawh Gvardiol hi a hming avang leh professional football a khelh tan tirh a ball a pet thiam avangin Manchester City manager Pep Guardiola hming ang hminglem pek a ni a, ‘Pep’ tia ko thin a ni.
City in tun nipuiah player an lakluh langsar pahnihna a ni a, a hnampui Mateo Kovacic chu June thla khan an lo lalut tawh.
“Mateo nen ram tan kan khel dun thin a, club ah pawh kan kheldun thei tur hi a tha dawn bawk.”
“Pep Guardiola nena thawhdunna huhn kan han nei tur hi ka nghakhlel tawh a, hmabak ka la ngah tih ka hria a, coach tha ber hnuaiah hma nasa taka sawn ka inbeisei.” tiin a sawi.