Aizawl: MNF media & Publicity department chuan Indegenous Tribal Leaders’ Forum (ITLF) buatsaiha Haolai Khopi, S. Bualjang/Torbung hmuna hnam tana martarte vuina hun urhsun taka hman tum chu Mizoram chief minister Zoramthanga ngenna avanga thulh rih a nih thu an sawi.
Inrinnia Aizawl Press club-a thu thar thehdarhtute an kawmnaah MNF Media & Publicity department General Secretary VL Krosshnehzova chuan Manipur buaina kal zelah August 3, 2023 khan ITLF buatsaiha hnam tana martar-te vuina hun hman tum a nih avangin Zofate leh Meitei inkarah a ruka inep tawnna boruak lian tak awmin, nunna tam tak chân belh thei dinhmunah an ding a, silai pawh a puak hman hial niin a sawi.
VL Krosshnehzova chuan Ministry of Home Affairs pawhin boruak tha lo zawk a thleng thei tih hriaiin lamkal a tir nghal tih sawiin, “Martar-te vuina hun hman tum chungchangah sorkar laipui leh ITLF aiawhten August 2, 2023 khan tum hnih zet meeting neiin, sorkar laipui aiawhte hian mitthite vuina hun sawn turin ngen mah se, an ngenna hi tihhlawhtlinsak nghal a ni lo a ni,” a ti.
Hetianga boruak rit ru tak hnuaiah Union Home Minister Amit Shah ngenna angin Assam Chief Minister Himanta Biswa Sarma chuan August 2, 2023 zan dar 10 khan Mizoram Chief Minister Zoramthanga chu biakhlatna hmanga rawn biain, ITLF hruaitute hnenah mitthite vui hun sawn tura ngenna thlen turin a ngen a. Chief minister pawhin ngaihtuahna seng zuiin, Central YMA President R Lalngheta nen ITLF hruaitute dawr dan tur chungchanga ruahmanna an siam hnuah August 2, 2023, zan dar 11 rik hma deuh khan Manipur Zofa hnam hruaitute chu biakhlatna hmanga biain, sorkar laipui chu Manipur buaina chungchanga thu thlente ngaihtuah saktu tur leh buaina chinfel dan tha zawk an beisei mekte ngaihtuahsaktu tur an nih avangin an ngenna ngaihthlaksak phawt a that thu leh a him rih thu a hrilh hnuah, mitthi vuina hun hi sawn a nih tak thu a sawi bawk.
VL Krosshnehzova chuan Mizoram Chief Minister Zoramthanga ngenna anga ITLF-ten sorkar laipui lam ngenna an remtih tak avang hian union home ministry lam pawh an lawm hle tih a sawi a. He thu hi Assam Chief Minister Sarma pawhin a hriat veleh, August 3, 2023 zing dar 8:30 khan Zoramthanga chu telephone-a rawn biain, a hranpa ngatin lawmthu a rawn hrilh leh niin a sawi.
MNF Publicity GS chuan, “Mizoram mai ni lo, khawvel hmun hrang hranga Zofate tana ding tlat thin, Manipur Zofa hnam hruaitute pawhin ‘Pa’ nih tlinga an ngaih, a thurawn leh ngenna te pawm tlaka an ngaih Chief Minister Pu Zoramthanga kan nei hi MNF party chuan chhuanawm kan ti hle a. Zoram leh Zofate kan insingsak mek lai hian hnam aiawha ding chhunzawm zel turin Pu Zoramthanga hi a tha ber a ni,” a ti.