Netherlands in FIFA Women’s World Cup-ah quarter-final a an hmun an tichiang a. South Africa lakah a tir atanga a tawp thleng tan tluan theiin hnehna pawimawh an chang.
Sydney Football Stadium a mipui 40,233 hmaah Netherlands in 2-0 in hnehna chang mahse an chak dan a awlsam lo. Tun tournament a fak hlawh tak South Africa in theihtawpin an chhaihbuai a, a tawp thlengin Dutch hmeichhiate an hahdam lo.
Oranjeleeuwinnen tan hian Manchester City lakluh thar Jill Roord chuan minute 9-naah goal khungin hma an hruai a. South Africa in an si phurh sut theihna hun an ngah.
Dutch goalkeeper Daphne van Domselaar chuan Banyana Banyana captain Thembi Kgatlana lakah save tha vawi li lai a siam a ngai.
Nimahsela kum 2019 final khel Dutch team hian Lineth Beerensteyn hmangin second half-ah an goal hnihna an khung.
Inkhel zawh lam
Netherlands manager Andries Jonker chuan an team in tun World Cup-ah tu pawh hneh thei an ni tih inhria in an rilru an siam thu a sawi a. Hetihlai hian midfielder tawnhriat nei tha Danielle van de Donk erawh yellow card vawi hnihna a hmuh avangin quarter-final a khel dawn lo.
Lyon midfielder Van de Donk hi Netherlands player pawimawh niin World Cup a match 15 an khelh tawh hovah bul a la tan vek.
Jonker chuan, “Inrintawkna lian tak kan nei a, chuvangin Danielle tana inkhel hnuhnung ber hi a ni dawn lo. Yellow card a hmu kha a pawi viau a, mahse engmah kan thlak danglam thei lo.”
“Danielle hian kan team-ah theihna danglam bik a lo keng tel a, a tel lo chuan a har ang. Mahse midfielder tha dang hi kan ngah a, ruahmanna kan siam ang.” tiin a sawi.
Champion lai an tla
United States Women’s National Team in a zawna vawi thum world champion nih tumin bul an tan a, beisei an pha lo tluan.
Round of 16 inkhelah Sweden chu hun pangngai leh extra-time ah an hneh thei lova, penalty-ah 5-4 in an tlawm.
Melbourne Rectangular Stadium-ah USA in minute 120 chhungin inkhel an thunun a, mahse Sweden goalkeeper Zecira Musovic che tha chu an su tlang thei lo.
Penalty hmanga chak zawk zawnnaah USA player pathum in an pet goal lova, heng zingah hian US chhuanvawr Megan Rapinoe pawh a tel a, season tawp a football chawlhsan tum tawh in a penalty a khung loh a pawi.
USA keeper Alyssa Naeher chuan Lina Hurtig pet chu dang hman niin lang mahse goal line a pelh hman avangin VAR chuan goal-ah a pawm a. Sweden an chak ta zawk.
US hmeichhe team hi World Cup chanchin a semi-final an thlen loh hmasak ber a ni.
USA manager Vlatko Andonovski chuan, “Ka player zawng zawngte ka chhuang hle. Group Stage a kan inkhelin sawisel a hlawh tih ka hria a, beisei kan pha lo.”
“Mahse vawiinah theihtawp kan chhuah a, huaisenna leh tlo na kan lantir a, chak tumin kan bei nasa hle. Kan theihtawp kan chhuah a, chak kan tum. Mahse football hi chu a nunrawng thin a, hetiang hi a thleng ve thin a ni.” tiin a sawi.