- Lallunghnema, Charity Lodge
Mipui zirtirna nei chi thu ziak hi thil na mai lo tak a ni a. Mahse tun thleng hian fahrah thu aia u awrh ka la ziak thei zel a. Ka lawm em em a, ka lawmna tizualtu chu chhiartute hnen atanga fuihna thu tha tak tak ka la dawng thin leh lo tangkaipui an awm ve zel hi a ni a. Hei hian chona leh phurna nasa tak min pe thin a ni.
Tun Chawlhkarah hian Hyderabad City-a Restuarant pakhat hrem thu leh ka message dawn thenkhat ka rawn tarlang dawn a ni. Heng ang thu ka ziah chhan hi eng dang vang mah ni lovin Mizote hian kan lo chhawr tangkai ka beisei vang a ni a. Thahnem ngai taka min lo chhiarsak zel thin turin ka ngen bawk che u a ni. Tin, i thil lei leh service i hmanna a harsatna i tawh chuan kan tanpui thei reng che a ni,tih hi ka sawi duh a ni.
Tichuan, hetiang hian bul kan tan leh phawt ang. Saptawng bawkin aw, Chanchin darh zau tak The Hindu chuan hetiang hian 30th July 2023-ah chuan a ziak a, “Consumer Panel directs Restaurant to pay compensation to vegetarian customer” tiin.
Hyderabad khawpui lian taka cheng DS. Chowbey chuan tahrik ni 10 August 2022 khan Concu Cakes Restaurant website kaltlangin Eggless Cakes Rs. 2500/- man pein a ordered a. Tahrik ni 16 August 2022-ah delivered a, chumi tlai la la chuan cake chu an han ei dawn ta a. Mahse Restaurant neitu intiam ang chu a lo ni ta reng reng lo mai a!. Hei hi Consumer Protection Act 2019 a,sec35 deficiency in service-in a sawi lai tak hi a ni.
He vai nu DS Chowbey beisei loh takin Artui telh cake chu lo ni rengin! A ei tur order ang an pek loh avangin D.S. Chowbey chu a lungawi ta hauh lo mai a. Artui tel lo tura cake pek an intiam laia artui telh an pek avangin Restaurant neitu hnenah a lungawi loh thu a hrilh a. Amaherawh chu,Restuarant neitute hian an lo ngaihsak tha duh lova.Chuvangin Miss Chowbey hi Customer Care hnenah a zualko bawk a ni. A lungawilohna thawi dam turin a tawpah chuan District Consumer Disputes Redressal Commission Hyderabad hnenah he Restaurant hi a khing ta a ni. Consumer Commission hnena a khin hma hian Restaurant neitute hian Rs. 2500/- refund bakah free meal pek an tiam a. Mahse complainant hian a pawm thei lo a ni.
Tichuan, a tawi zawngin sawi mai ila, Commission chuan judgement siamin Restaurant hi thiam loh an chantirin compensation Rs. 40000 chawi tur leh Commission a kalna senso phuhruk nan Rs. 1000/- chawi turin a hrem ta a ni. Customer ngajhsak loh man an tel a ni ber e.Hetiang mi hi Aizawl khawpuiah pawh hian an tam ngawtin ka ring a ni.
Consumer Commission chuan artui tel lo cake tih leh artui tel cake lai tak hi a pawimawh lai tak chu a ni, a ti a ni.
He thuziak atanga kan zir tur chu : Vaiho hi an theu neu lo!. Vaiho hian an dikna leh chanvo an hria, an huaisen hle.
Ramdangah chuan mipuiin Consumer Commission an chhawr tangkai hle. Mizoramah hian consumer-te i harh chhuak ve tawh ang u. Hmasawnna dik a ni e, kan ti a ni.
Mizoramah hian Hotel, Restaurant, Catering Service changkang tak tak kan nei ta a. Ruai siam buai lovin catering kan uar hle. Restaurant changkang tak takah kan chawl hahdam fo bawk. Dine -out lah thalaite tawngkam tlanglawn a ni. Hetih laia kan sawi uar tur, mihring tana tul chu ei tur thianghlim felfai tah hi a ni.
Inneihna hmun khata ka kalnaah chuan an ei tur buatsaih (catering) chu a tui lo hle mai a. An chaw (rice) pawh ban chelh chulh hi a ni a, an bai thakte lah chu a thak em em ringawt mai a. An main item ni awm tak sa lah chu a hel deuh titih leh nghal a. Kei chuan, “Mami, khawiah nge in awm? ka ti a. Aizawl tlak lamah kan pite hi an awm, catering neitute hi” ti chauhvin min chhang a. Kei chuan, “A nih tak chu, in thil siam hi uluk deuh tawh rawh u aw! ka han ti ve satliah bgawt a.A sawt loh hmel khawp mai.
“Pawisa chawia chaw eitute hi chaw leh chaw hmeh beisei pha lo service pek hi a tha lo. Intlansiak in nih hi hre reng rawh u, ka han ti leh ngawt pek a”!
Hyderabad vai nu ang hi Mizo nu zingah awm ve se, huaisen taka mahni dikna leh chanvo sual chhuak ngam kan mamawh a ni. Consumer-te harh chhuah lohna hmun leh ram hi i ni zui zel lovang u,kan ti a nih hi!
Aizawlah hian Pu Vanlalmawia leh a hote vhu Aizawl District Consumer Commission-ah an awm a, chu bakah Consumer Union leh Consumer Centre kan awm bawk. Harsstna neite chu an pui hreh ngai lo!
Kei teh lul hian tih tur dang nei lo na fam chu, consumer-te tan hian ka inpe ve thuai mai a. Complaint lo lut hi ka buaipui reng mai a ni. A nuam ka ti em em a, insawi theihna pawh ni lovin, consumer harsate tanpui thei a ka awm hi ka lawm em em a. He lam lehkhabu ka buatsaih thei leh an thu leh hla sawia ka ziak thei te, min lo phurpuitute hmel ka hmuh leh ka hriat hian ka lawm veng veng a ni.
Ka thian thenkhat party politics buaipuitute buai dan lo deuhvin ka buai ve a, consumer-te chanvo humhalh buaiin ka buai zel dawn a, ka inchhir lo zel ang!
Awle,Complaint ka dawn zinga message ka dawn hi kan tarlang ngawt teh ang.
“Pa Hnem, ka thawh tirha(on-line service pakhat) kan inbiak dan chu, “Thla khat thawh tlin loh chuan hlawh a lak theih loh, performance a zirin hlawh chu kan pun ang” an ti a. Mahse ka thawh hnu rei vak lovah agreement dang sign turin min ti a. Chuchu ka duh loh avangin ka bang a. Ka ban hnuah hlawh ka dil a, ban dawn chuan ban hma ni 15 a la awmin sawi tur a tih avangin hlawh min pe duh lo”.-:Kan nau pakhat,a hming thup.
Aizawl atanga km 92 vela hla a awm Khanpui nu pakhat chuan Aizawl a nu pakhat hnen atangin Drawer lei a tum a. Pawisa chu hetiang hian a pe.
1) Drawer man – Rs. 5500/-
2) Delivery charge – Rs. 70/-
3) A vaiin – Rs. 5570/-
Heng pawisa te hi Khanpui nu hian Gpay hmangin a pe tlak nghal vek a. Mahse he thu ka ziah lai hian bungrua a la hmu lo. Mizo nuin Mizo nu a bum dawn a ang khawp mai! Drawer zuartu nu hi biaksak mek a ni.
Thu dang deuh, tun laiin Electric pawhruk (theft) a tam thu ka dawng nual mai. He Kristian ramah hian!
Thil leinaa harsat nei apiangin Centre for Consumer Education, Mualvengchung, Republic pan theih a ni e. Contact-9862288182.
Pathian hruainain chawlhkar lehah pawh kan ti tiho leh theih ka beisei.