Wolverhampton Wanderers chuan Premier League season tan dawn karah an manager Julen Lopetegui nen an thawhdunna an titawp a, ex-Bournemouth manager Gary O’Neil a thlak an tum.
Wolves hian hun engemaw chen atangin an coach kum 56 mi hian club chhuahsan a duh tih an hre tawh a. A chhuah thu an sawinaah hian an kal zel dan tur chungchangah thu inhmuh loh a awm avangin contract an neihlai tihtawp chu a tha ber nia an hriat thu an sawi.
Premier League club hian an thuchhuahah hian, “Tunhnai kar engemaw zah chhung khan inbiakna kan kalpui a, thil engkim felfai leh puitling takin kan nei thei vek. Club pawhin hmalam kan panna kawnga manager tur ngaihven theihna hun kan neih theih phah a, Julen Lopetegui leh a staff ten season thar atan kan squad an buatsaih bawk.” tiin an sawi tel.
Lopetegui chhuah duh chhan hi Wolves in player lakluh an phalsak loh vang a ni a, hna a thawh tirhin squad tihchak chu a tel tura a ngaih hnuah tun nipuiah a thei lo.
Wolves hian Premier League financial fair play dan an bawhchhiat loh nan player lakluh nan sum an hmang thei lova, an player pawimawhte an hralh then nual tawh zawk.
Lopetegui hi Wolves hotuten nipuiah player manto lo zawk leh naupang zawkte a lalut thei ang tih an hriattir hnuah free transfer bakin player a lalut thei dawn lo tih an hriattir leh a. Hemi hnuah thu sut lehin tumah a lalut thei dawn lo tih an hriattir hnuah chhuah a thlang ta a ni.
A thlaktu atana Wolves in an hual O’Neill hian season liamta khan Bournemouth chu chhanhim mahse Andoni Iraola in Cherries hotuten an thlak zui ve thung.