MNF Adviser Lalruatkima, I&PR Minister ni bawk chuan MNF MP-in parliament session neih mekah sorkar rintawk lohna ‘No Confidence Motion’ a thlawp dawn niin a sawi.
Nimina a twitter account-ah Lalruatkima chuan Lok Sabha-a Manipur-a buaina thleng avanga sorkar rintawk lohna (no confidence motion) eptuten an put luh chungchangah MNF chu dinna nghet leh ngaihdan mumal tak nei a nih avangin MNF MP pawh sorkar rintawk lohna sawihonaah hian a tel ngei dawn niin a tar lang.
Lalruatkima chuan, “Manipur-a Zohnahthlak unauten harsatna leh buaina namen lo an tawh hre chung leh an tawrhnate hi kan tawmpui tlat a, sorkar laipui hmalak dan chu a duhkhawp awm loh em avangin sorkar rin tawk lohna hi MNF MP chuan a thlawp dawn a ni,” a ti.
Hetih lai hian sorkar rintawk lohna puh luh chungchangah social media-ah ‘MNF MP-ten BJP an thlawp dawn’ tih thu thang awm chu MNF IT & Social Media department chuan thu dik tawk lo theh darhah eptu party-te an puh.
Thuchhuah an siamah MNF IT & Social Media department chuan parliament monsoon session neih mekah no confidence motion put luh niin sawiho neih mek a ni a. Eptu party-ten social media-ah thuchhuah dik lo vawrh darhin, ‘MNF MP-ten BJP an thlawp dawn,’ tih thu an theh darh chu thu diklo, dawt a ni tiin, “Hei hi thu belh chian dawl lo, mipui bum tumna ni ngeiin a lang a. He No Trust Motion debate hi neih tan chauh niin, prime minister pawhin motion reply a la neih loh bakah vote lakna a la awm lo hrim hrim,” an ti.
MNF IT & Social Media department chuan MNF party hian Mizoram, hnam leh Mizo sakhaw kalh thil reng reng chu a tawp thlengin a dodal zawk dawn tiin, “NDA emaw, BJP thlawp zawngin emaw, MNF MP-te leh MNF party hian eng thutlukna mah a siam loh bakah vote tumna a nei lo,” tia tar langin, MNF Party President Zoramthanga, Chief Minister hi NDA emaw, BJP emaw pawh nise a do ngam thu leh Mizoram leh hnam, sakhaw tana pawi thei turah chuan principle nghet tak neiin a dinna ngaiah a la ding reng niin an tar lang bawk.