AIZAWL: ZPM leader Lalduhoma chuan Pathian leh mipui zarah an sorkar chuan an sorkar kum khatnaah thlai thar pali an lei dawn tih a sawi.
Thawhtannia ZPM-in an party pisaa chhung inkhawm an neihah thu sawiin Lalduhoma chuan, an sorkar chuan leiba tam tak chhawm dawn mah se, an sum neih ang angin a kum khatnaah thlai thar pali an lei dawn tih sawiin, “Heng thlai pali bakah hian Mizoten kan tharchhuah ve reng, a sawngbawlna kan neih loh vanga sum tam tak kal ral thin – kuhva, panhnah leh buh-huma sum luangchhuak zawng zawngte Mizo ipteah a tam thei ang ber kan luhtir dawn a ni,” a ti.
Kuhva chungchang sawiin Lalduhoma chuan, ZPM Research Wing-in an chhut dan chuan kuhva hi thla thum ei vel chauh Mizoramah thar chhuah a ni a, a dang zawng chu ram dang atanga kan lak luh a nih thu a sawi a. “Bawngkawn leh Zarkawtah ringawt pawh thla tina lo thleng thin hi bag 10,000 vel niin, chu chu Rs. nuai 550 man vel a ni a, kum khatah chuan nuai 6,600 vel zet mai hnamdangin an rut a, a uiawm tham hle a ni,” tiin, kuhvaah intodelh dan dap a ngaih thu leh a chin dan thlengin thlai dang nen hlawk zawka chin pawlh dan pawh ngaihtuah a tul tih a sawi.
Panhnah pawh chawlhkar tin truck phur kua vel Bawngkawn leh Zarkawtah a thleng thin a, chawlhkar khata ei ral zat chu cheng nuai 36 man vel niin, thla khatah cheng nuai 144, kum khatah cheng vbc 17 man vel eiral a nih avangin intodelh a ngai a, sorkar chakna nena hmalak a nih chuan a hlawhtlin theih a rin thu a sawi bawk.
Economic Survey 2022-2023-a a lan danin kum khata Mizoramin buh a thar chhuah zat chu matric tinne 62,182 a ni a, tlangram lo neih leh leilet aatangin kum tina mamawh zaa 34 vel chauh thar chhuah a ni a, a bak zawng chu FCI atanga lei pawh kham khawp a ni lo a, open market-ah tam tak lei leh a ngai tih sawiin Lalduhoma chuan, “Buhfaia kan rama tharchhuahte hian kan mamawh eng emaw chen phuhru thei tura tan lak a ngai a, hnam dang iptea sum lut tam tak hi Mizopa ipteah a lut dawn a ni. Keini chuan buh humin kan lei ang,” a ti.
ZPM leader chuan an hmalakna tur a sawi te chu sorkarin leiba a ngah em avangin an sorkar kum khatnaah beihpui thlak nghal thei mai lo mah se, an ngaih pawimawh ber a nih avangin thapui thawha hma an lak zui nghal tur thu a sawi a. Buhhum erawh chu lei an tum thu a sawi bawk.