Aizawl: Mizo Hmeichhe Insuihkhawm Pawl (MHIP) chuan nimin khan thuchhuah siamin social media hman danah mi tinte fimkhur turin an ngen.
MHIP chuan tun hnaiah social media hman sual avanga hrem tawk an awm fo ta chu pawi an tih thu an sawi.
Sex video/thlalak thehdarh kawngah te, account neituin a duhthu ngeia a thehdarh emaw, mi sex video/thlalak lo thehdarh sak emaw chu IT Act 64A hnuaia hremna theihna dan hrang hrang a awm tih an sawi.
Hei bakah, naupang chunga pawngsual, kutthlak leh khuaikhemna thlengah, pawi khawihtu chu kumtling lo pawh nise Juvenile Justice Act 2015 hmangin hrem theih a nih thu leh, kum tling a nih chuan POCSO Act, 2012 hmangin kum tam tak lungin tan leh pawisa chawi tir theih a nih thu an sawi bawk.
Khawvel thiamna hmangin kan Police ten rang takin an chhuichhuak thei zel tawh a, mitin te Social media kan hman danah fimkhur turin MHIP mipuite an chah a; hemi kawngah nu leh pa te pawhin an tu leh fate’n pawi an khawih loh nan nasa zawka inzirtir thar leh turin chhungtinte a ngen thar bawk.