Tanhril-a artui tihkeuna hmun, ZPDS INDBRO Hatchery Farm chu tihchangtlun thar a ni a, he farm atang hian artui 25,70,740 leh arte 16,98,100 a thar chhuak tawh.
Zoram Poultry Development Society (ZPDS) hnuaia arnote leh artui thar chhuahna hmunpui tihchangtlun nan hian NABARD RIDF sum Rs. nuai 533.76 leh SASCE atanga sum hmuh Rs. nuai 445 sen a ni a, artui tihkeuhna hmanraw hrang hrangte leiin, staff quarters thar te, rainwater harvesting tank te, 30 KwP Solar Roof top leh tul dangte siam a ni.
Farm tihchangtlun thar hi Vety Minister Er Lalrinawma chuan nimin khan a hawng a, ZPDS INDBRO Hatchery Farm, Tanhril chei that leh tihlen hna kalpuia hawn fel a ni ta chu lawmawm a tih thu te, he farm-in sorkarah chhiah eng emaw zah an chhung lut thei chu fakawm a tih thu a sawi.
Ran hrang hrang leh a kaihhnawih enkawl kawnga hmalatu Vety Department-in tha taka mawhphurhna a hlen zel thin leh mipui tana ran chi tha zawk pek chhuah kawnga hmalaknate lawmawm a tih thu a sawiin, hei hian sa, artui leh bawnghnute thar chhuah kawnga intodelh tura ke penna kawngah awmze thui tak a nei tih a sawi a ni.
ZPDS INDBRO Hatchery Farm hian May 18, 2015 atanga tun hun thlengin artui 25,70,740 leh arte 16,98,100 a thar chhuak tawh a, sorkarah chhiah Rs. 32,85,679.89 a chhung lut tawh bawk a ni.