Mexico-a sorkar enkawl company, Pemex ta, tuipui kama tuialhthei lak chhuahna hmuna kangmei chhuakah mi panga an thi a, mi paruk velin hliam an tuar bawk.
Chhanchhuah hna thawktute chuan an chin hriat lohva awm mi pahnih an zawng mek bawk.
Kangmei chhuak avang hian he hmunin gas leh electric hmanga a chawm tuialhthei khur 125 vel chu hna thawk thei lovin an awm phah.
Chawlhkar ruk liam taah khan Gulf of Mexico-a tui hnuaiah Pemex pipeline atanga tuialhthei putin tuipui pawnah kangmei nasa tak a lo chhuak tawh bawk.
July-a kangmei chhuak hi ‘eye of fire’ tia sawi niin a thlalakte chu social media-ah an thehdarh nasa hle.
Tun hnaia kangmei chhuahna hmun pahnih hi Pemex-in tuialhthei a sawngbawlna hmun pawimawh ber, Gulf of Mexico-a awm, Ku-Maloob-Zaap nena inpawh vek an ni.
Company chief executive, Octavio Romero chuan chhiatna thlengah hian fimkhur loh leh inthlahdah vang a tel loh thu a sawi.
“Eng emaw hmanrua leh mamawh tlakchham vang a ni lo va, oil industry hi risky industry a ni a. Chhiatna kan tawk a, kum dang kal tawhte ai chuan a la tlem hle zawk a ni,” tiin Thawhtannia thuthar lakhawmtute a kawmnaah a sawi.
Kangmei a chhuah lai hi thawktuten an thawh mawlh mawlh lai a nih thu a sawi.
Pemex hian Ku-Maloob-Zaap atanga tuialhthei pek chhuah chu Nilaini atang hian a pangngaia a kal leh tur thu a sawi.