Mizoram a tualchhung football league sang ber Mizoram Premier League season thar chu vawiinah an khel tan dawn a, inkhel vawi hnih a awm nghal dawn.
Rajiv Gandhi Stadium-ah MPL season 10-na hi khelh tan a ni dawn a, kumin inelna hi Zote Toyota chuan sponsor in Zote Toyota Mizoram Premier League tih a ni ang.
Champion lai inlan nghal
MPL9-ah chhuanawm takin Chawnpui FC an champion. Season tirah rinkai an ni lo chungin MPL trophy an lakna kalkawng chu thawnthu ngaihnawm a tling. Vawiin chhun dar 12-ah Electric Veng FC nen an inkhel ang.
Champion lai hian hlawhtlinpuitu coach Lalsangzuala Hmar nei tawh lo mahse season hmasa a final a FC Venghnuai hruai thlengtu coach thang duang tak Lalrindika Hmar hnuaiah an khel dawn. An coach hi khingpuite zirchiang peih tak leh insiamrem thiam a ni a, an khirh viau ang.
Player lamah tualchhung football a ke veilam hlauhawm ber zing ami neitu tawnhriat ngah Vanlalthanga an nei a, Best Defender dawngtu Lalruatfela la nei bawkin David Lalchhuanawma an kawl bawk.
Season tanna inelna I-Day ah Chawnpui hian uiawm takin semi-final an lut zo lo. Nikum lam an la pha lo deuh niin lang mahse an inbuatsaihna a that chuan champion thei team an nihna a bo mai lovang.
An hma a ding tur hi Project Veng FC an ni a, MPL a vawikhatna atana khel tur kaithar club an ni.
Kolasib club tan chona hautak tak a ni dawn. Aizawl pawn team awmchhun an ni a, tun I-Day football-ah erawh match thum atangin point hmu miah lo mahse an laka hnehna chang tura beih fe a ngai thin. An inbuatsaihna a that chuan beisei loh result sual chhuak thei an ni.
Hetihlai hian league kal chhung a rei a, first phase chhungin point tam thei ang ber hmu tura bul tan that an tam a pawimawh dawn.
Inkhel hnuhnungah I-League club Aizawl FC leh Electric Veng FC te tlai dar 3-ah an inkhel dawn.
I-Day final ah team langsar zawk an ni chungin an vanduai a, hei vang hian Aizawl FC in hnehna nena bul tan an tum dawn.
Tlarhmaah Lalrinzuala chu thlirbik tur a ni leh ang. Hetihlai hian K. Lalrinfela’n goal pawimawh a khung thei viau a. Midfield-ah Lalramsanga a tangkaina a langsar thin. Electric Veng FC tan fiahna hautak an tling dawn.
Electric Veng FC hi football hmuhnawm khel thin an ni a. ‘Possession football’ khel thiam team an nih laiin a hmawr an bawk thei thin lo chu nikum lamah an tuar.
Kuminah team naupang tak nen inelna an hmachhawn dawn, an tan season awlsam lo tak a ni thei.
Hetihlai hian Aizawl South Football Academy nen an thawkdun a, player talent nei tha tak takte inlar an team atangin an awm ngei a beiseiawm.
Thil dang
Kumin MPL-ah first phase ah round sarih khelh a ni dawn a, September thla chhungin an khel zovang.
First phase-ah hian kum danga tih thin angin district dangah round khelh a ni dawn a, round 6-ah Project Veng FC in an ‘home ground’-ah FC Venghnuai an mikhual ang.
Kuminah champion team in lawmmanah cheng nuai 6 an dawng dawn a. Pahnihna in cheng nuai 3.3 an dawng ang.
Team zawng zawng lawmman leh mimal lawmman zawng zawng sen tur nen kumin MPL-ah hian lawmman atan cheng nuai 20 chuang sem ral a ni dawn.