Nirmal district, Telangana-a hmun kilkhawr takah nu pakhatin kawng sirah nau a hring a. Amah phurtu tura an koh ambulance chu kawngah a diesel a tlan kang avangin a thleng zo lo a ni.
Tribal nu, Gangamani-i hi Thulasipet khuaa cheng niin darkar li zet kawnga an buai hnuah kawng sirah a hring ta ringawt a ni.
Gangamani-i pasal chuan nau a hrin dawnah hian ambulance an ko va; mahse, kawng a that tawk loh avangin an khua a thleng thei lo va, an khaw mite puihnain Dothi lui an kanpui a, a kamah an nghak ta niin a sawi a. Mahse, ambulance hi a diesel a lo zawh avangin a lo kal thei lo niin a sawi bawk.
“Tuialhthei manah Google Pay hmangin Rs. 500 ka thawn a; mahse, a lo kal chuang lo va, kawngah nau chu kan hring ta a ni,” a ti.
A hnuah 108 ambulance a thleng a, a lai hrui chhahsak niin naute leh a nu chu a bulhnai damdawi inah an hruai ta chauh va, an pahnih hnihin an dinhmun a tha.
Nirmal district collector Varun Reddy chuan NDTV hnenah nau neih hun hi September 22 daih a nih thu a sawi.
“Hmun kilkhawrah hi chuan inkalpawhna a buaithlak deuh thin avangin nau paite hi a hma deuh takah neihna tur an pan thin a; mahse, tun tuma mi hi a hun tura tih aia chawlhkar li lai a ni,” tiin a sawi.
Collector hian ambulance hi diesel a neih loh vanga thleng zo lo anga sawi erawh a nih loh thu a sawi.
“Ambulance hian a hmun a thleng ngei a; mahse, a lo vei tawh a, khawih chet chi a nih tawh loh avangin a hmunah chuan hrintir a ni a, tunah chuan Khanapur-a Community Health Centre-ah tha takin an awm tawh,” a ti bawk.
Reddy-a hian nikum tui lian khan lei a lak avangin Thulasipet khuaah hian lirthei a lut thei lo tih a sawi bawk.
“Lei thar dawh tur hian tender kan chhuah tawh a, tumahin an chhang lo,” a ti.