India leh China chuan an ram hruaitu lu ve ve an inkawm hnuah ramria an buainaa boruak tang tak awm reng chu titawp turin an inrem tih Indian thuneitu sangin a sawi.
Prime Minister Narendra Modi leh President Xi Jinping te hi Nilaini khan South Africa-a Brics summit neihnaah an inbia.
Beijing chuan inbiak hi Modi-a’n a ngen anga neih a ni tih a sawi.
India leh China hi ramri chungchangah tun hnai kum thum chuang chu an lo intithiam lo tawh.
Khawvel ram thiltithei tak pahnihte hi km 3,440 zeta thui ramri chiang lo tak intawm niin Line of Actual Control (LAC) an ti a, Himalaya tlangdunga kal a ni.
Xi leh Modi te hi Brics summit neihna, Johannesburg-ah an inkawm a. Brics ram an tihte hi Brazil, Russia, India, China leh South Africa niin khawthlang ram intelkhawmin khawvel an hruai lutuk tur dal tura tangho an ni.
Ningani khan Indian Foreign Secretary Vinay Kwatra chuan ram pahnihte hian LAC hrula sipai inchhawp teuh chu titlem turin ram an ti dun tih a sawi.
“Prime minister hian India leh China inkar pangngai taka a awm theih nan LAC-ah muanna leh inremna a awma inzah tawn taka an awm tul a ti,” tiin a sawi.
“Chutiang tur chuan hruaitu pahnihte hian an hnuaia thuneitute ve ve chu inrem lohna leh inepna tidai turin an ti a ni,” a ti.
China foreign ministry pawhin thuchhuah siamin hruaitu pahnihte hian ‘China-India inkar chu thuk tak sawiin an ngaimawh zawngte an sawi dun’ tiin a sawi.
“President Xi hian China-India inkar leh a mipuite kar hi tithat a duh a, muanna, inrintawnna leh khawvel leh a chhehvel tihhmasawnna tura tan zel a duh a ni,” tiin thu a chhuah.
The Indian Express chanchinbu chuan ram pahnih hruaitute inbiaknaah hian an kara tawng lettu emaw, an sawi lo chhinchhiahtu bik emaw pawh an awm lo niin a tar lang.
Xi leh Modi-a te hi kum 2022 khan G20 summit-ah an lo inbe tawh bawk.
Xi-a hian India a tlawh dawn bawk a, Delhi-in September 9 leh 10-a G20 summit a thlen turah a tel dawn a ni.