Paraguaya-a emergency services chuan kum thum chhung a zawna ram kang an tawrhna an hmachhawn leh mek a, khawkheng leh thlasika khaw lum tam avangin South American ramah hian ram a kang nasa hle.
Hmun hrang hrangah ram hi a kang a, a nasatna ber chu hmarchhak lama Concepcion leh Amambay-ah a ni a. Mei khu dum chhah tak chuan an khawpui, Asuncion pawh thlengin van a tisen phut a, boruak a tibawlhhlawh hle.
Ramngaw humhalh lai panga velah pawh a kang a, Cerro Cora National Park hmun 70% vel, hectare 5,836 vel zet, ramsa tamna leh hman lai hmun hlui awmna a kang chhe tawh niin thuneitute chuan an sawi.
“Khua a lum a, thli a tam a, a ro em em bawk a, ruah a sur lo rei tawh bawk si a, hei hi kangmei a chhuah chhan pakhat a ni,” tiin ram kang lama mi thiam, Dario Perez chuan a sawi.
Khua a khen rei em avangin South America-a tuikawng sei ber dawttu, Brazil, Paraguay leh Argentina kaltlang, Parana River pawh kum 77 chhunga a chim hniam lai ber a tawng mek.
Ram kang hian ram leilung fa, PaiTavytera an tihte dinhmun a tiderthawng hle a, anni hi Paraguay hmarchhaka cheng an ni ber.
“Tun ang reng reng hian ram kangin min la tibuai ngai lo,” tiin Cerro Akangue hnam hruaitu, Silvino Mendoza chuan a sawi a. Tun hnaiah Cerro Akangue mite chenna eng emaw zat a kang chhia tih a sawi.
Pay Tavytera-te hmun thianghlim ber, Jasuka Venda tlanga mi pawh meiin a hual avangin a derthawng hle a. An hnam hruaitute chuan sorkar hnenah an awmna hum turin an thlen tawh a, chhanna erawh an la dawng lo.
Perez chuan kang thelh tura inpe bakah a thawk hrim hrimten theihtawpin ram kang hi thelh tumin an bei a; mahse, hmanrua an neih that tawk loh avangin an che chak thei lo niin a sawi.
“Thelh thiam tak tak kan nei a; mahse, hmanraw lakna a harsa a, hmanrua an mamawh tak zet a ni,” a ti.
Tun tuma kangmei an tawh mek hian khawvela hmun hnawng (wetland) lian ber leh heng hmuna cheng leh awm chi nungcha leh hnim tamna, Pentanal pawh a tiderthawng mek a. Kum 2019-a a kan tum khan hectare 61,000 zet kangin nungcha leh hnimin a tuar nasa hle a ni tih NGO Guyra Paraguay chuan a sawi.
South America-a ramngaw chhah ber dawttu, Gran Chaco pawh ram kang hian a tiderthawng mek bawk.