Bairabi leh Sairang inkara rel kawng tur siam mekah Sairang Kurung lui chunga lei dawh mek chima thi mi 23-te ruang chu hmuh kim a ni tawh.
Nilainia Sairang zero point bula lei dawh lai chimin a chimpui ruang zawn hna chu ngawrh taka thawh niin, nimin chhun dar 12:50 vel khan ruang pakhat hmuh leh a ni ta a, heti hian thite ruang chu lak chhuah kim nia hriat a ni a; he chhiatna thlengah hian hliam tuar pathum an awm bawk a ni.
Tar lan tawh thin angin rel kawng tur lei dawh mek hi Nilaini zing dar 9:30 bawr vel khan a chim a, lei dawh chim ni khan ruang 19 hmuh niin, lei chimin a chimpui ruang la hmuh lohte zawn hna chu Sairang, Sairang Dinthar, Mizoram Police, BSF, Central YMA hnuaia rapid respond team leh ADDMA hnuai QRT ten ngawrh takin an thawk chhunzawm zel a, nimin piah khan ruang pathum hmuh a ni a, nimin khan ruang pakhat hmuh leh a ni ta a ni.
Lei dawh chim avanga thite ruang hi Sairang Dinthar Branch YMA Hall-ah dah luh zel niin, sorkar hnuaia thawk doctor-ten an postmortem nghal zel a. Sairang khaw chhunga branch YMA-te bakah khawpui chhunga branch YMA-ten kuang an siam a, ruang hi tawih thei lo tura buatsaih (embalm) a nih hnuah railway department lamin an khuaah an thawn a, nimin piaha hmuhte pawh nizan dar 8:30 khan an thawn tawh a, nimina hmuh leh tak pawh postmortem a nih hnuah an khuaah thawn leh a ni dawn a ni.
Rel kawng tur lei dawh chim avanga thite hi West Bengal mi, mipa vek an ni a, railways ministry chuan he chhiatna thleng chhuitu tur high level committee a din a, thla khat chhunga thil thlen dan chhui turin a ti a. Sorkar laipui chuan lei dawh chim avanga thi chhungte hnenah zangnadawmna a pe dawn bawk a ni.