- Remruatpuii Pa (CCL)
Thian thà neih hmasak tum lo la, thiante tána thian tha nih hmasak tum zâwk rawh. Thil thà reng reng a dawna dawn lam atang ni lovin, a pêka pêk chhuah lam atangin a intan thìn. Motor khalhtute’n kawng thui tak an zawh hnuah kawng chhe lai leh kawng tha lai an hriat hran theih ang hian, kum upa tak takte’n an kawng lo zawh tawh atang leh ní an lo hman lìam tawh atangin thian tha leh thian tha lo an hre chiang ber thìn.
Mihringte kan lo pìan atanga kum tam a ral hmain thian kan nei tan a. Kum a tam tulh tulh a, thian pawh kan nei tam tulh tulh thìn. thian neih hi thil harsa a ni lo va, thian thà neih erawh thil harsa tak a ni. thiana kan inchhar dàn hi a inang vek lo va; nimahsela, kan mizia leh kan thil tih duh dàn te, kan tuina zâwn a inan avàng tein thianah kan insíam tlángpui thìn.
Thian thàte hi engtin nge kan hriat theih angt Zan thim chhah tak kára arsite a lan thín ang hian, thian thàte chu mangan níah an lo lang thìn. Thufingte 17:17 thu kan chhìar chuan, Lal Solomona’n, “thian chuan englai pawhin a hmangaih reng a, mangan ní atána unauva piang a ni,” tìin thian hlutzia a sawi a. Benjamin Franklin-a phei chuan, “Unaupa hi thian a ni kher lo thei, mahsé thian chu unaupa a ni reng,” a ti hial a ni! He lei rama kan chèn chhúng hi chuan kan nu leh pate, kan u leh naute bulah kan awm reng thei lo fo va, chhan hrang hrang avàngin hmun tin leh ram tinah kalin kan khawsak a lo ngai thìn. Nun hi a hlìm reng theih loh avàngin ngui cháng ní leh chauh cháng ní a lo thleng a, harsat buaina leh manganna nasa tak tak tawh cháng níte a lo thleng thìn. Chu hun harsa tak pal tlang thei tùr chuan kan thian thàte chu unau mai ni lovin kan nu leh pate ang hialin an pawimawh thìn a. Kan tum ram kan thlen theih nán an puihna kan mamawh fo thìn.
Frank Johnson-a chuan, “Thian chu kan thil engkim hria, mahsé a tha chauh hre rengte hi an ni,” a ti a. Socrates-a chuan, “thian thà leh rinawm neih tluka thil hlu a awm lo,” a ti bawk. thian leh thian inkárah inrin tawnna a awm phawt chuan thian nih a tinuam a. Eng pawh sawi ila mahni leh mahni rilrua inkâwm ang maiin kan thu sawi engmah a pût ru dáwn lo tih a chiang a. Chu chuan thian thàte bula awm a tinuam a, vèn thàwn ngai miah lova kan thurûk kan sawi ngamna hmun a nih avàngin thlá a muang thìn. thian thàte chu thiante tán an rinawm a, sik leh sâ a inthlák ang leh laikîngin a zia a thlák angin an mizia a inthlák zung zung ngai lo va, sakeiin a zia a thlák ngai loh ang hian thiante tán an ze ngai an la pu reng thìn.
Chungléng savate’n bûng rah hmin vàngláia a rah nasa taka an tlàn thín ang leh, a rah hmin a awm tawh loh hnua rah tlàn tùr dang zawnga hmun dang pana reh leh vang vang thìn savate ang thian i nei ngai emt Mamawh lái chauha min ngai pawimawhtu leh min mamawh tawh loh hnua min kalsan leh mai thìntute hi thìan thàa chhìar theih an ni lo va. Unau áia nghet zâwk thian an awm thìn tihah phei chuan chhìar theih an ni lo lehzual.
Hmànlái kan pi leh pute hun lái khán sâ leh rál lakah pawh an pasalthàte kha thiante chhan nán an nunna hial an chán ngam thìn. Mizo thufingin, “Dam leh tláng khatah thih leh ruam khatah,” a tih kha an nunpui tlat thìn a ni. thiante thi mai tùr kalsana mahnia lo him bîk kha an duh ngai lo. Thufing pakhatin, “thian chu – khawvêlin an chhuahsan vek lái che a i kianga lo lût duh awm chhun hi a ni,” a tih kha, hetiang dinhmuna kan din lái chiah hian thian thà dik tak chu an lo lang thìn.
Calgary Bod Edwards-a chuan, “thian leh hmél hriat danglamna chu – thian chuan min tanpui a, hmél hriat chuan thuràwn min pe,” a ti. tawngkam thlum sang chuang áiin tanpuitu kut pakhat a hlut zâwk zia a chiang hle àwm e. A thu chauh ni lova a tak ngêia tiha tihin kawngro a su thui zâwk bawk. thian thàte inkárah thil tih a tel loh chuan thil thà a awm thei lo. Chutih rúal erawh chuan, tawngkam thà thil tihina a zui zêl tluka hlu erawh a awm chuang lo. Aristophanes-a’n, “thian chu thlarau pakhat taksa pahniha cheng hi a ni,” a tih angin, thian thà chu mi hrang angin lang mah sé, chhúng rilah erawh a inpumkhat tlat thìn. Thing kung zungin nghet taka a lang china a din theih nán lang lo lamah tan a lo khawh thín ang hian, thian thàte inkárah pawh inhmangaihna thûk tak lang lo lamah a awm thìn. Publilius Syrus-a paw’n, “I thian chu a rûkin zilh la, mi dang hriatah chuan fak rawh,” a tih kha.
Thian nei tùrin mîte thian ni la, thian thà nei tùrin mîte tán thian thà nih tum rawh.