West Ham United in player thar an la dap chhunzawm a, tun nipui a ngaihven hlawh tak Ajax midfielder Mohammed Kudus chu lalut turin inbiakna an neihpui.
Kum 23 mi Kudus hian Ningani khan Europa League play-off-ah Ludogorets lakah hattrick a siam a, hemi hnuah hian a hma lam hun zawh zui niin Ajax tana a inkhel hnuhnung ber a ni mai thei tih a sawi.
Tun nipuiah Kudus hi Premier League atangin ngaihventu an tam viau a. Chelsea nena sawizawm a nih bakah Brighton & Hove Albion pawhin an umzui viau a. Ajax nen a man turah inbe rem mahse player nen inremna an nei thei lo.
Kum 2018 khan Ghana international Kudus hian Danish club Nordsjaelland-ah professional football a khel tan a. An tan vawi 57 inkhelin goal 14 a khung a, midang goal khung tur vawi thum a siamsak.
Kum 2020 khan Euro maktaduai 9 in Dutch club Ajax in an lalut a, hetah hian inchher hriamin attacking midfield, right wing leh striker angte in chhawr kual a ni fo.
Ajax tan hian inelna hrang hrangah vawi 87 inkhelin goal 27 a khung a, assist vawi 12 a nei.
Amsterdam-ah hian Dutch Cup vawi khat a lakpui bakah Eredivisie title vawi hnih an la bawk.
Ghana tan kum 2019 khan inkhel tanin vawi 24 a inlan tawh a, nikum Qatar a World Cup-ah match thum an khelhah bul tan vekin South Korea 3-2 a an hneh tumin goal hnih a khung.
Hammers hian Ajax an dawrna zat puanzar ni lo mahse Pound maktaduai 35 vela inrem theih an beisei a, an lalut a nih chuan Ajax atanga tun nipuia Hammers zawmtu pahnihna a ni ang.