India-a police-te chuan sikul zirtirtu pakhatin a zirlaite zinga Muslim kum sarih mi beng tura a zirpui dangte a ti lai video darh an chhui zui mek.
Mipa naupang hi a thianten an ben lai hian tap pur tih video-ah hian a lang a, a times table a dik loh vanga bentir nia sawi a ni.
Video hi social media-ah nasa takin a darh a, sawisel leh demna thawm a nasa hle.
India-a eptu hruaitu, Rahul Gandhi chuan sorkarin sakhaw zui azirin intihduhna a kalpui nasa nia sawiin sorkar a dem hle.
He thil hi Ningania Uttar Pradesh-a mi mal enkawl sikula thleng a ni.
“Engati nge khatia zawi têa i ben? Na deuhvin beng rawh,” tia zirtirtuin a naupangten an ben laia a lo sawi ri pawh video-ah hian a lang a ni.
“A kawngah khan vua ula, a hmai a sen tan a, a kawngah khan vaw zel rawh u,” a ti bawk.
India-a thuneitute chuan video hi a tak ngei a nih thu an sawi a, action pawh lak nghal a ni dawn tih an sawi.
Mipa naupang an ben pa hian Muzaffarnagar district-a police hnenah a thlen tawh a, sikul atang hian a fapa chu a la chhuak nghal a; mahse, engmah nawr zuina a nei lem lo.
Mihring dikna chanvo humhalhtu pawlte chuan kum 2014-a Prime Minister Narendra Modi-a’n thuneihna a chan atang khan India-a sakhaw zuitu tlem zinga a tam ber, Muslim huatna leh an laka tharum thawhna a thleng tam zual niin an sawi.
Uttar Pradesh-ah hian kum 2017 atangin Hindu nationalist BJP-in thuneihna an chang.
Gandhi-a chuan he party hian India ram pumah sakhaw inkara inrem lohna leh inhalna a tipunlun nasa niin a puh.
“Rilru sual pu lo naupangte zingah inen hranna chi tuh a ni a, hmun thianghlim sikul pawh inhuatna bazarpui ang maia chhuah a ni,” tiin social media platform X-ah a tar lang.
“Hei hi BJP-in a deh kai a ni a, India ram pum kil tin a kang kai a ni,” a ti bawk.
June thlaa Modi-a’n US a tlawh tum khan chanchinbumite hmemah ‘India-ah inenhrannain hmun a chang lo’ tih a sawi.