US Navy SEAL-a tel thin, kum 2011-a Osama bin Laden thattu nia inchhal chu kar liam ta tir lam khan Texas-ah mi a sawisak avangin man a ni tih The New York Post chuan a tar lang.
Robert O’Neil-a hi Nilaini khan Frisco-ah thubuai siamsak a ni a, $ 3,500 dahkhamin chhuah lehnghal a ni tih New York Post chuan a tar lang a, hei hi Texas state-a Dallas-Fort Worth vel thil thleng tar lang thin, The Dallas Morning News atanga a lak chhawn a ni.
Navy SEAL-a tel thin hi mi hliam khawpa kut a thlak avangin Class A misdemeanour charge pek a ni a, vantlanga mi kut a thlak avangin Class C misdemeanour of public intoxication pek a ni bawk a; mahse, lung in chhinchhiahnaah chuan mi kutthlak chauh tar lan a ni tih The New York Post hian a tar lang bawk.
O’Neill-a hi US-in kum 2011-a 9/11 attack thlentu bulpui ber, Osama bin Laden-a tawmna, Pakistan-a an luhchilh tuma a kap hlumtu ber a nih avang khan hriat a hlawh hle.
An beihpui thlakna hi kum 2017 khan ‘The Operator’ tia a hming phuahin lehkhabu a chhuah nghe nghe a. US sorkar chuan a kaptu hi amah a ni ngei tih engmah an sawi ve lo.
O’Neill-a hi thuneituten an man vawi hnihna a ni tawh a. Kum 2016 khan rui chunga lirthei a khalh avangin Montana-ah man a lo ni tawh a, thubuai siamsak nual ni mah se lung in erawh a tang lo.