Aizawl: Champhai South bial chhunga Zion veng, New Champhai leh Tlangsam khuaa Congress party unit tlawhchhuahna hun nimina a neihah MPCC thupuangtu, Dr Lallianchhunga chuan party dangte aia Congress party danglamna chu policy rintlak an nei thin hi a nih thu a sawi.
Dr Lallianchhunga chuan chuan kumin MLA inthlan lo awm tura Congress party manifesto pakhatna, ‘Tang Puihna’ hnuaiah din chhuah tuma tan latute puihna tur cheng vaibelchhe tam tak budget-ah an dah dawn tih a sawi.
Kut hnathawktute fairel bel thleng phak tur ‘Tang Puihna’ policy chu an tihhlawhtling ngei dawn nia sawiin Dr Lallianchhunga chuan, “Dinchhuah tuma tan la duh thalaite tan pawh ‘Tang Puihna’ hnuaiah ruahmanna siam a ni a. Zirlai lehkhathiam thei si; mahse, sum harsatna tawkte tan pawh ‘Tang Puihna’ hmangin sorkarin tanpuina pek a tum bawk,” tia sawiin, “Congress party-in, ‘Kan ti ang,’ kan tih chu Pathian leh mipuite zarah ti theia kan awm phawt chuan kan tihlawhtling thin a, hei hi party dangte laka Congress party danglamna a ni,” a ti.
Ramria insumdawn tawnna chungchang sawiin MPCC Media Department chairman ni bawk, Dr Lallianchhunga chuan Congress party sorkar loh chhung reilo teah Myanmar nena insumdawn tawnna kawngah harsat a thleng nasa hle a. Covid-19 a ziaawm hnuah pawh Mizoram lam gate chauh khar a nih thu leh Manipur-ah chuan Moreh-a insumdawn tawnna ramri gate hawn a nih tawh thu a sawi.
Congress party chuan dan lalna ram sorkar an siam dawn a, dan hnuaiah an huaisen hle dawn tih sawiin, “Border gate duty, Assam Rifles-te biak thiam ringawt a tawk lo, sorkar laipui au thiam kan mamawh a ni. Nakum Lok Sabha inthlanah Congress party kaihhruai I.N.D.I.A hian BJP paih thlain sorkarna a siam ngei dawn a, mipui ngaihdan lakna hrang hranga opinion poll tinah I.N.D.I.A a chak zel. Mizoramah pawh ‘Tualvungi ko thiam Congress party’ kan sorkartir a ngai a ni,” a ti bawk.
Unit tlawhchhuahnaah hian MPCC Secretary Lalchawla bakah Champhai South Block Congress Committee (CSBCC) President Rosangzuala leh a thawhpuiten Dr.Lallianchhunga hi an tawiawm a ni.