North Eastern Council (NEC) sum Rs nuai 278.25 senga sak tur West Phaileng-a Market building thar sak tur lungphum chu nimin khan Commerce & Industries Minister Dr R Lalthangliana’n a phum.
West Phailenga Market Building thar sak tur hi August 22, 2025-a sak zawh hman tura ruahman a ni a. Building zauzawng hi 857.57 sqm. niin, a building hi Mizopa chhiara chhawng thum-a sak tura ruahman a ni.
Lungphum phumna inkhawmah Dr R Lalthangliana chuan, Mizorama a hmasa ber tur atana NEC sum hmanga market building tha tak sak a ni tur chu a lawmawm a tih thu a sawi a. Market building thuamthat zui zelna tur pawh NEC lam dawr chhunzawm a nih thu a sawi.
Dr R Lalthangliana chuan sorkar hmasa hmalakna sorkar tharin an ngaihsak thin loh avanga thiul tam tak hmalakna a khaihlak thin chu pawi a tih thu sawiin, “A bikin kum 10 danah sorkar a inthlak thin a, sorkar a inthlak hian hmalakna tam tak a thuanawp thin,” tiin, Covid-19 leng mai ni lo, ram dangin harsatna an tawh ve lem loh harsatna hrang hrang vawk hri, ral tlan leh a dangte hmachhawn tur tam tak awm chungin sorkar chuan harsatna leh buaina tam tak karah hmasawnna hnathawh thahnem tak a neih thu a sawi bawk.
Health department changtu ni bawk Dr R Lalthangliana chuan, Marpara PHC Building sak thar mek chu hawn mai tura peihfel a ni tawh thu sawiin, Health & Family Welfare Department hnuaiah pawh hmasawnna tam tak hmuh a nih thu a sawi a. Doctor indaihlohna nasa tak awm thin chu ZMC atanga doctor zir chhuak, internship bei mek 70 atanga 80 dawn an awm hian doctor indaih lohna a phuhhruk a beisei thu a sawi bawk.
Commerce & Industry Additional Director Lalsangpuii kaihhruai inkhawmah hian bialtu MLA Lalrintluanga Sailo pawhin thu a sawi a ni.
Lungphum phum zawh hian Health Minister hian West Phaileng-a PHC leh West Phaileng Higher Secondary school te a tlawh nghal bawk.