Formula 1 world champion ni lai Max Verstappen-a’n ruahsur in a tihkhaihlak nasat intlansiakah hmahruaitu a nihna a hloh hunlai awm mahse hnehna a chang leh thova. Dutch Grand Prix-ah pakhatna a ni.
Circuit Zandvoort tlankawngah Dutch driver hian mahni ramah a zawna kum thum nan hnehna a chang. Kum 2013 a Red Bull car khalh chunga Sebastian Vettel-a’n a zawna chak hnem ber record a siam chu tluk chiah bawkin a zawnin vawi 9 a chakna chiah a ni.
Verstappen hi kuminah vawi 11 a chakna niin world championship-ah point 138 in hma a hruai fal tawh a, lehpelh theih la ni mahse thil beiseiawm a ni tawh lo.
- Intlansiak hmuhnawm
Kuminah Red Bull Racing an chungnun avangin intlansiakah an hnung ami zawkte inum a hmuhnawm zawk thin fo. Nimahsela tun tumah erawh ruahsur avangin engkim a danglam.
Intlansiak tan veleh ruah a sur a, hei vang hian lap hmasa berah kawng huh a hman tur tyre a thlak nghal an awm. Thlak hmasa ber Sergio Perez a ti fuh a, pasarihna a bul tan Mexican driver hian lap hnihna a tyre thlak Verstappen chu tlan khalh theih phahin hmahruaitu thar a ni.
Nimahsela Dutch driver hi a team in ‘strategy’ hmangin lap 13-naah hma an hruai tir. Lap 11-naah kawng ro tan mekah tyre pangngai an vuahsak. Perez chu lap 12-naah an ko lut ve thung a, Max-a’n tyre thar nen a tlan chak theih tawh avangin Perez a ‘undercut’ a, a lo chhuah chhungin hma a hruai leh hman.
Lap 8 a la awmin ruah a sur nasat em avangin intlansiak chawlh lailawk a ni a, minute 48 hnuah chhunzawm leh niin Aston Martin driver Fernando Alonso chuan a hma a Red Bull car hi um viau mahse a fimkhur a ngaih avangin ‘risk’ la in um ngawrh lo a thlang.
Verstappen chuan, “Dutch Grand Prix ah ka chak leh avangin ka lawm hle. A zawna vawi 9 chak hi thil ropui tak a ni a, thil tih leh theih a ka ngaih pawh a ni ngai lo. Intlansiak erawh ruah vangin a harsa hle.” a ti.