Aizawl: Ram pum huapa zirtirtu tha chawimawina, National Award to Teachers 2023 dawng turin Kolasib Diakkawn High School zirtirtu, Lalthianghlima chu thlan a ni.
Sorkar laipuia education ministry chuan tun hnai khan National Award to Teachers 2023 dawng tur hi a puang a, a dawng tur hian Mizoram atangin Govt. Diakkawn High School zirtirtu, Lalthianghlima chu thlan a ni a, mi 50 thlan an ni a. He award hian chawimawina thuziak leh pawisa fai Rs. 50,000 bakah silver medal a keng tel a ni.
National Award to Teachers dawng tur hian, zirtirtute chuan tehfung leh kalphung fel tak chi hrang hrang an paltlang a ngai a; Village Level Committee atanga bul tanin district, state level leh Independent National Jury ten an endikna an paltlang vek a ngai thin.
National Awards to Teachers 2023 hlanna inkhawm hi kumin September 5, Zirtirtute Ni-ah New Delhi-a Vigyan Bhawan-ah neih a ni ang a, President Droupadi Murmu-i’n a hlan dawn a ni.
School Education Minister Lalchhandama Ralte chuan National Award to Teachers dawng tura Lalthianghlima thlan a ni chu chhuanawm a tih thu a sawi a, zirtirtu thate hi ram tan an hlu tih leh zirlaite kawng sialtu pawimawh a nih zel theih nan duhsakna a hlan a. National Award to Teachers hi mi tam zawkin an dawn theih nan zirtirtu tha leh chhuanawm tak tak ten tan la zel se a duh thu a sawi bawk.