Kum kua liam taa Pablo Picasso-a lemziah hlu tak, Greek gallery-a an dahna atanga ruk bo tak chu hmuh chhuah a ni.
Pathianni khan Athens khawpuia police-te chuan Picasso-a lemziah, Woman’s Head hi kum 1905-a Dutch artist Piet Mondrian-a lemziah, windmill nen a rualin an hmu chhuak.
Heng lemziak hlu tak pahnih leh a dang pakhat chu kum 2012 khan Athens National Gallery-a an dahna hmun atangin ruk bo an ni.
Lemziakte hi an tarna frame atangin zing hma taka luhchilhnaah lak thlak a ni a, hetianga ruk nan hian minute rei lote tak tak chauh a rutute hian an hmang nghe nghe.
Reuters news agency-in amah insawi duh lo police thuneitu sang pakhat hnen atanga thu a dawnah lemziak an hmuh rual hian Greek pakhat an man tel a. Lemziakte hi khawpui daia luikawra thuhrukna atangin an hmu chhuak a ni.
Pathiannia lemziak hlu tak pahnih hmuh chhuah a nih hma lawk, tun hnai la rei vak lovah khan Greek police-te chuan lemziak bote hi an ram chhungah ngei a la awm a rinawm thu an sawi nghe nghe.
Picasso-a lemziak, hmeichhe lem hi ama larpui, signature cubist style an tih niin National Gallery-a dah tur hian amah ngeiin kum 1949 khan a pe a. A pek lai hian milem chu a hma kum 10-a a ziah a nih thu leh an ramin an rama Nazi Germany lut turte a dan chhinchhiahna atana a ziah a nih thu a sawi.
Mondrian-a lemziak ve thung hi a rututen an ruk lai hian an tlan chhuah lehna lamah an thlo nghe nghe.