AZL: ZPM Leader, Serchhip MLA Lalduhoma’n autorickshaw permit chu mipui mamawh aia tam pek a nih tawh avangin tihtawp a hun tawh hle tih a sawi.
Nimina Serchhip Auto Rickshaw Owner Association (SARAO)-in Silver Jubillee an lawmna a hmanpuinaah Duhoma chuan, “Auto rickshaw service hna chu eizawnna tlak ni mah se permit pek chhuah a thahnem a, a nei thenkhatten an hralh chhawn leh mai mai thin bawk avangin eizawnna tlak loah a chhuah tep tawh,” a ti a; permit pek chhuah thin chu tihtawp a hun tawh takzet tih a sawi.
Driver-te chu Mizo tlawmngaihna vawng nung rengtute an nih thin thu leh auto rickshaw khalhtute chu hei hi chawinung zel turin a chah.
SAROA-in jubilee an lawmnaah hian an member-te zinga ‘Driver kum upa ber’, ‘Driver Polite ber’, ‘Motor enkawl uluk leh tifai peih ber’ leh ‘Auto stand tifai peih ber’ thlanchhuah hnenah lawmman hlan.