Aizawl : ZPM Consultant PL Liandinga chuan kumin MLA inthlan lo awm turah ZPM candidate te’n eiru lo tura an intiamna avangin Mizoram hi an khaichhuah a rin ngheh tlat thu a sawi.
Thawhtannia ZPM party in an pisa-a chhung inkhawm an neihah thu sawiin PL Liandinga chuan, ZPM candidate te thusawi ropui a tih chu ‘kan eiru lovang’ tih hi a ni tiin, “Hman ata tawh kan ram hmasawnna daltu chu eirukna hi a ni a, eiruk loh ringawt pawh hian hmasawnna chu amahin a lokal mai a ni. Mahni hnuaia mite eiru khap ngam lo khawp ni tur chuan dawihzep ngai deuh a ni. Kan ram hruaituten an hnuaia eirukna an tihreh theih loh chhan chu anmahni an fihlim loh vang a ni ang tih hi ka ring tlat a ni,” a ti.
ZPM Party Consultant chuan eirukna hi retheihna avanga awm a nih loh thu leh rilru zawk a nih thu a sawi a. Tlang hrang hrangah ZPM-a inziak lut phur em em te’n contract hmu a hlep teuh lam rilru pu lo va, Mizoram hi ding chhuak a chang ve se tih ngaihtuah avangin zawkin hnukulh dawna ZPM sorkar hun an nghak a. ZPM MLA candidate te’n eiru lo tura an intiamna chuan Mizoram hi an khaichhuah a rin ngheh tlat thu a sawi.
Sorkar kal tawhte’n ei ru lo turin an intiam ngam ngai lo tih sawiin PL Liandinga chuan, “Kan MLA te berin an eiruk loh phawt chuan midang tan eiruk ngam a har khawp ang. Hlemhletna hian kan nunah hmun thuk tak a luah tawh a; mahse, ZPM kan sorkar chuan kalphung thar hnuaiah thlai thar kan lei emaw, sawhthing kan lei emaw, a nih pawhin thil a nih tur angin a lo thleng mai dawn a ni,” a ti.
PL Liandinga chuan tun sorkarah pawh hian eirukna laka fihlim em em, MLA leh Minister awm mah se, an che thei lo tih sawiin, “Sports lam na takin an nawr dawn emaw tih laiin phullem phahah an tawp leh ringawt a, kan population ngaihtuahin India rama phul lem ngah ber kan ni ringawt,” tiin, ZPM an sorkar ang a, khawiah nge kalphung thar chu ti a inzawh inzawh a ngaih loh tur thu leh Kamrul-a tel lova sorkar kalpui ringawt pawh kalphung thar a ni tawh dawn tih a sawi.
A chungchang sawiin PL Liandinga chuan, April 20, 2023-a ZPM in bial viltua an puana a tel ve a. April 23, 2023-ah damdawi inah lutin, vawiin thlengin dam fel hlei thei lovin a la awm a. Hei hi mi thenkhatin ZPM atanga bang tawhtein an sawi chungchangah, “Ka bang lo a ni tih lantir nan hrim hrim pawh vawiinah party headquarters-a thusawina hun ka chang thei hi ka lawm takzet a ni,” a ti.