Ei ruk thubuaia kum thum chhung tang tura Pakistan prime minister hlui, Imran Khan-a hremna chu tihkhawtlai rih a ni a; mahse, lung in atangin a chhuak dawn em a la hriat loh.
Islamabad High Court chuan Thawhlehni khan hremna an pek a khinna a ngaihtuah hle hma zawng atan bail-in a chhuah a ni.
Hetih lai hian court dangin thubuai dangah kum 70 mi hi Nilaini thleng kawl rih turin a la ti thung.
Khan-a dan hre mite chuan nikuma a thuneihna atanga paih thlak a nih hnuah khan chi hrang hrang 100 chuangah an puh niin an sawi.
Thubuai an siamsak zingah hian ram thuruk tiputah puhna te leh tharum nena lungawi lohna lantir huaihawta puhna te pawh a tel a. An puhna hrang hrangah hian man theihna thupek pawh chhuah a ni nghe nghe.
Khan-a erawh chuan heng an puhna hrang hrang hi politics thil avanga amah an beihna hmanrua mai niin a sawi.
Prime minister hlui dan hre mite chuan Supreme Court-ah thubuai dangah man a nih lohna tura venna an dil a; mahse, engtikah nge an dilna hi ngaihtuah a nih dawn hriat a ni lo.
Supreme Court hian a hun tur a tuk hmain Thawhlehnia high court thuchhuak hi a ngaichang phawt niin an sawi.
“Minchhuah ngei kan inbeisei hle a ni,” tiin a dan hre mi zinga pakhat, Gauhar Khan chuan a sawi.
“Tun thleng hi chuan thubuai dangah man a ni tih hriattirna kan la hmu lo,” a ti.
Khan-a hi man a nih dawn khan thla eng emaw zat a pumpelh a, man tuma kal police leh amah tantute pawh an innawr fo a ni.
May 9 khan court-a inlan tura a tiha a inlan loh avangin man a ni a. Ni thum hnuah an man dan chu dan lo tiin chhuah leh a ni.
Man a nih chiah hian Pakistan pumah amah tantute an thinrim a, tharum nena chea amah a tlakhniam theihna bul nia puhin sipai thil an suasam nual a. Heng thinrima chetnaah hian mi sang tel an tel niin hriat a ni.
Hemi hnuah hian Khan-a leh a kaihhruai, Pakistan Tehreek-e-Insaf (PTI) party chu tukdawl a ni zel a, an hruaitu lawk tak tak man an ni a. Tunah phei chuan a hmaa amah tana nasa taka au thinte pawhin social media-a an thil tar lante pawh an paih leh nual tawh nghe nghe.
Amah tan vanga tharum thawha che man zinga thenkhat hi siopai court-ah tharum an thawh avangin an chungthu ngaihtuah tur an ni a, hei hi mihring dikna chanvo humhalhtu pawl chuan an duh lo hle.
Khan-a hian a hmain an ram sipaite chuan inthlanah an inrawlh nasa nia puhin mipui rorelna an tichhia niin a lo puh tawh.
Pakistan-ah hian sipaite hi politics-ah an inrawlh thuk hle a, a chang chuan thuneihna pawh an chang thin a, roreltu tur pawh a lang lo atangin an rel nasa hle.
Mi thiam tam tak chuan kum 2018-a Khan-a’n inthlana hnehna a chan pawh khan sipaiten an pui niin an ngai.
Eptu a nih hnuah erawh nasa takin sipai a bei a, a larna pawh a tlahniam chak niin mi thiamte chuan an ngai.
Pakistan-ah hian August 9 khan parliament thian niin sorkar lailawkin inthlan thleng an hruai dawn a, kuminah inthlang tur an ni a; mahse, an sawn hmel.
Dan anga an kal dawn a nih chuan November thla tirah inthlan tur a ni.