Home Minister Lalchamliana chuan Manipur leh Myanmar tual chhung buaina avanga sahimna zawnga Mizorama raltlan mi 44,247 an awm mek tih a sawi a. Sorkar laipui atanga a bika Manipur raltlante chhawmdawlna tur Mizoramin a dilna erawh tun thlengin tihhlawhtlin a la nih loh thu a sawi.
Thawhlehni khan a department hrang hranga hmalaknate sawiin Lalchamliana hian Aizawl Press Club-ah thu thar thehdarhtute kawmin, Manipur-a tual chhung buaina nasa tak chhuak avanga Mizorama sahimna zawnga rantlan mi 12,883 an tling tawh tih a sawi a. Raltlante chhawmdawlna atan hian Mizoram sorkarin Rs vbc 5 a pek chhuah tawh laiin, sorkar laipui atanga chhawmdawlna tur sorkarin a dil erawh an la hmuh loh thu a sawi.
Myanmar atanga raltlante chhawmdawlna chungchang sawiin home minister hian, tun dinhmunah mi 31,364 an awm meka chhinchhiah an nih thu a sawi a. “Heng mite chhawmdawl hna hi a tir tê atangin Mizoram sorkar chuan a ngai pawimawh hle a, central sorkarin dan loa India rama lut anga pawma thawn kir tura a tih pawh huai takin a dodal a ni,” tiin, Mizoram sorkarin Myanmar atanga raltlante chhawmdawlna nan Rs 3,84,66,000 a pek chhuah tawh thu a sawi a. Heng bakah Zo hnahthlak, Bangladesh atanga raltlante pawh a theih ang anga lo tuamhlawma tanpuina pawh pek an nih thu a sawi bawk.
Home minister chuan Mizoram sorkarin Assam leh Mizoram ramri buai a ngaihven hle a, he mi-ah hian tha tichak turin Rs nuai 233.71 hmangin Vairengteah company hqrs sak zawh a nih thu a sawi a. Tripura leh Mizoram inrina hrulah sorkarin venhimna a ngai pawimawh a, Rengdilah police building leh quarters eng emaw zat, Rs nuai 346.18 hmanga sak zawk ni tawh bawkin 4th IR Batallion ten an awmchilh niin a sawi.
Home minister sawi danin, hnu chhuina kawnga an tangkai em avangin Mizoram Police section 40 leh Out Post 13-ah CCTV Surveillance system chu August 26, 2022 khan bun fel a ni a. Mizoram Police-in Crime & Criminal Tracking Network System (CCTNS) chak taka bawhzuiin, kumin July thla thleng khan Mizoram hmun hrang hrangah criminal case 39,500 chu State Data Centre-ah khung fel a ni tawh bawk.
A sawi zel danin Fire & Emergency Service chuan July 1, 2021 khan High Pressure Pump Fire Tender lirthei pathum, kang thelhnaa tangkai tur lei ni bawkin, 15th Finance Commission-in Modernisation & Strenthening of Fire & Emergency Service atan Rs vbc 40 allocation Mizoram tan a siam a, hemi atan hian DPR buaipui mek a ni.
Taxation minister ni bawk, Lalchamliana chuan kum nga chhungin department-in chhiah a lak khawm a thang nasa hle tih a sawi a. Kum nga (2018-19 – 2022-23) chhunga chhiah lak khawm punna chu hi zaa 20 niin, State’s Own Rax Revenue (SORT)-ah dept hian a thawh hlawk hle tih a sawi a. Sorkar kum kal mek, 2023-24 chhung hian July thla thleng khan chhiah lakkhawm Rs vbc 415.84 a lut tawh a. Hetah hian GST-ah Rs vbc 353.41, VAT-ah Rs vbc 58.36 leh Prof tax-ah Rs vbc 4.05 a lut tawh niin a sawi.
Lalchamliana chuan non tax revenue tihsan tha a tih thu sawiin, “Sorkarin kan ina tui leh êng chhit man min pek nan sum tam tak an seng a, man tlawm zawkin kan lei leh a, sorkarin sum tam tak a chawi phah a ni. Chuvangin, mipui hian sorkar kan puih let a ngai tawh a. Hei hi politics-a lak chi pawh a ni lo, mi retheite hmangaih loh vang tia inchirhtheh chi pawh a ni tawh lo, party anga inbeihna chi pawh a ni tawh lo,” a ti.
DM&R dept enkawltu, Lalchamliana chuan Hunthar lei tlahniam avanga NH-54 chhia leh lei min belh zel lohna tur atana DPR chu sorkarin a siam a, project amount chu central share Rs vbc 10.99 niin, state share chu Rs vbc 9.86 a ni a, he DPR hi central sorkarin a pawmpui hnuah hma lak nghal a nih thu a sawi a. Kum 2017-a tui lianin a tichhiat chi hrang hrangte thawmthatna tur proposal (DPR) Rs nuai 1,483 man hu siam a nih hnuah Ministry of DoNER-in pawmsakin pek chhuah a nih tawh thu a sawi bawk.
DM&R minister sawi danin khuarel chhiatna tuarte chhawmdawlna atan State Disaster Response Force (SDRF) atan kum 2018-2023 chhungin Rs vbc 170.20 dawn niin, tun thleng hian Rs vbc 104.59 pek chhuah tawh a ni a. Khuarel chhiatna laka invenna/siam thatna lam kaihhnawih State Disaster Mitigation Fund (SDMF) atan 15th Finance Commission chuan kum 2020-2026 chhunga hman turin Rs vbc 67.80 ruahman niin, tun thleng hian Rs vbc 19.30 hman tawh a ni a. Myanmar atanga raltlante chhawldawmna tura Mizoram sorkarin Rs nuai 300 a dil chu sorkar laipuiin a tumpui thu a sawi.