US Open-ah a inkhel hmasa berah hnehna a chan avangin Novak Djokovic chu world number one thar a ni dawn a. Tunhnaia a elpui ber ni thar Carlos Alcaraz chu men’s rankings tharah a thlak ang.
Serbian star hi Wimbledon final-ah Alcaraz nen an intum a, hemi tum hian a khingpui lakah hian a tlawm. Thawhtanni zanah New York khawpui a Flushing Meadows a inkhelah Alexandre Muller chu 6-0 6-2 6-3 in a hneh.
Kum 36 mi hi nikum khan US Open-ah hian a inkhel thei lova. Covid 19 vaccine a lak duh loh avangin United States inkhuahkhirhna dan a zawm thei lova, a inkhel thei lo.
Tun tumah erawh inlan thei tawhin tennis chanchin a Grand Slam title la hnem ber record tluk chiah turin a vawi 24-na atan champion a tum dawn.
Djokovic hian record tluk ngei tumin bul a tan a, a inkhelah pawh hlawhtlin ngei a tum tih a lantir.
“Ka bul tan dan a tha viau a, kan inkhelh tan tlai ngaihtuah chuan ka kheltha a, inkhel har deuh mah ila ka phur hle. Kum hmasa lamah ka inkhelh loh avangin helaia inkhelh leh hlan ka nghakhlel tawh hle a ni.”
“Set hnihna leh set thumnaah ka service a tlahniam a, point hmu turin ka beih nasat zual a ngai. Nimahsela ka khelchhe lova, ka match hmasa ber atan chuan ka inkhelh dan a lungawithlak viau.” tiin a sawi.
Kumin Australian Open leh French Open a champion a champion Djokovic hian a vawi li na atan US Open-ah hian champion tumin a bei dawn a. Second round-ah Spanish mi Bernabe Zapata Miralles chu a hmachhawn leh dawn.
World rankings thar lo awm tura Alcaraz khum tur hian point a hmu hnem tawk a ni.
- Inkhel dang
Mipa inkhel dangah seeded number four Holger Rune chu tla hma langsar a ni a. Spanish mi world number 63 Roberto Carballes Baena chuan 6-3 4-6 6-3 6-2 in a hneh.
Dominic Thiem chuan inhliam avanga court a inlan mumal thei lova kum hnih a hman hnuah 25th seed Alexander Bublik chu a hneh a. Kum hnih hnua Grand Slam inkhela a chak leh hmasak ber a ni.
Nikuma final khel Casper Ruud leh seeded number seven Stefanos Tsitsipas te pawh an chak.