Zoram People’s Movement (ZPM) leh Hmar People’s Convention (HPC) chuan nimin khan Sakawrdaiah thawhhona thuthlung an ziak a, MLA inthlanpuiah HPC-in ZPM candidate-te an pui dawn.
Thawhhona thuthlungah hian ZPM aiawhin ZPM Vice President Dr. Kenneth Chawngliana leh HPC aiawhin President Rohringa ten hming an ziak a. An thawhhona thuthlungah hian HPC party-in kumina MLA inthlanpui neih turah candidate siam lovin ZPM party official candidate-te tlin theihna turin theihtawp an chhuahpui dawn a, Sinlung Hills Council (SHC) inthlanpui neih hunah ZPM leh HPC an thawkho ang.
An thuthlunga an tar lan danin, ZPM a lo sorkar chuan HPC/HPC (D) nena sorkar inremna awm tawhte tihlawhtling turin hma a la anga, SHC headquarters, Sakawrdai chu a taka function turin hma a la anga, HPC movement avanga martar chhungkua leh ex volunteer-te sorkar hnuaiah a theih anga chhawmdawlna leh duhsakna a siamsak ang a, SHC chu thuneihna hrang hrang mumal taka siam a ni anga, SHC service rules felfai taka siam a ni ang.
Thawhhona thuthlung ziahna puala inkhawmah hian ZPM Vice President Dr. Kenneth Chawngliana leh HPC President Rohringa ten thu an sawi a, ZPM zawm thar mi 152 lawm luhna hun hman a ni bawk.