China chuan naupang kum ruk leh kum sarihte chu ziaka exam-tir a khap.
Zirna lama intlansiakna nasa tak awm mek laiin sorkar chuan nu leh pa leh naupangteah hahdamna thlen tuma hma a lakna thar a ni.
Zirlaite hi primary school an kai kum khatna atanga university-a lut tur thlengin exam an hmachhawn a, hei hi kum 18 an nih vel thleng a ni.
Education ministry chuan hetiang hian zirlaitea pressure nasa tak siamin ‘taksa leh rilru’ lamah harsatna a thlen thei niin an sawi.
Ministry-in thuchhuah a siamah, “Exam hi school education-ah chuan a pawimawh lai a ni a; mahse, sikul thenkhatin harsatna an nei a, zirlaite tan phur rit tha lo a thlen bawk a. Heng hi siam that ngei tur a ni,” a ti.
Dan siam tharah chuan term khata test leh exam buatsaih theih zat pawh siam tel a ni.
“Elementary school-a first leh second grade chuan ziaka exam an neih a tul lo va. Grade dangah erawh school-in semester tinah final exam an buatsaih thei ang. Junior high-ah mid-term exam siam theih a ni ang a, primary school-a eng pawlah mah tual chhungin ram bial emaw, sikul dang nena inelnaa an buatsaih thei lo vang,” tiin Ministry of Education (MOE) chuan a sawi.
“Junior high la chhuak lo zirlaite chu kar tin test, unit exam, thla tin exam leh a dangte buatsaihsak phal a ni lo,” an ti bawk.
Sorkar dan siam thar hi China-a social media platform Weibo-ah ngaihdan a inang lo hle a. Mi tam takin naupang leh nu leh pate tana pressure nasa lutuk chhawk tia sawiin an fak hle a. Hetih lai hian sikulin naupangte theihna chu exam tel lovin engtin nge a hriat theih ang tih an zawt ve thung.