Aizawl : Champhai South bial chhunga Jail veng, Bethel, Vengthar leh Ruantlang-a Congress party unit-in thawhlehnia tlawhchhuahna hun an hmanah MPCC thupuangtu Dr Lallianchhunga chuan Congress sorkar chu a chhe lai siamtha tu a lo ni tawh thin tih a sawi.
MPCC Media deptt chairman ni bawk Dr Lallianchhunga chuan, Champhai South bial chhunga hmasawnna ruhrel hman tangkai lohte chu Pathian leh mipui zarah Congress a sorkar chuan hman tangkai theih tura an siam that leh tur thu sawiin, “Mi tam tak tan eizawnna a alawmsam phah dawn a ni,” a ti.
Compensation tam lutuk avanga MNF sorkar laia chawlhsan tawh Tuirial Hydel project pawh Congress sorkarin a din thain, kawlphetha a siam chhuah zawng zawng pawh Mizoram in a chang vek a, a thlawn a zaa 12 kawlphetha Tuirial Hydel Project atanga dawn tawh zawng zawng chu cheng vbc 30 chuang man a ni hial tawh a ni. Falkawn Referral Hospital tluchhe vek tawh pawh Congress sorkarin a din thar lehin, Covid-19 hripui lakah pawh Mizoram tana kulhpui rinawm ni phakin a thuam tha a, mi tam takin Pathian zarah damna an chang tawh niin Dr Lallianchhunga hian a sawi.
Dr. Lallianchhunga chuan, “MNF sorkar hnuaia kan ram sum leh pai dinhmun chhe mek pawh hi ram sum leh pai enkawl thiam Pu Lalsawta hoin siamthat kan duh takzet a. Sorkar hnathawkte a hun taka hlawh pek leh sorkar hnathawk ten an GPF an lak chhuah theihna tura ram sum leh pai dinhmun siam that te hi Congress sorkar lo chu ti thiam an awm lo vang. MNF sorkar hnuaiah tunah hian nausen piang hlim pawhin Rs. 90,000 chuang an ba mek a ni,” tiin, ram sum leh pai dinhmun siam that a nih theih nan Congress party an sorkar a tul thu leh, thusawi thiam ringawt hi ram hmasawnna a ni lo tih Mizoram mipuiin an hriatchian tawh thu a sawi bawk.