India khawpui, Delhi-a thuneitute chuan G20 summit an thlen turah khawpuia zawngte tam tak awm chu an kian theih dan tur a dap mek.
Langur monkey a tak tak tiata lehkhakhawnga siam chu khawlai hmun hrang hrangah dahin hei hi zawng tê zawkte hlauh atan an ti a, ramsa hram ri ang tichhuak thei tur mihring pawh zirtirin an hlauh atan an ti.
Delhi hi zawng ngah em em an ni a, thuneitute chuan summit tibuai lo tura an thiarfihlim theih ngei an inbeisei.
India hian September 9-10 chhung hian G20 hruaitu intawh khawm a thleng dawn a ni.
Langur an tihte hi zawng chi khat tho niin mei sei tak an nei a, an hmai a dum bawk a. Anmahni kaihruai tura zirtir bik an awm a, zawng dang hmuha an chhuahpui chuan zawng dang hian an hlau thin a ni.
Sorkar hotu lian pakhat chuan langur lemte hi zawng an tamna hmun bikah deuh an tar tih a sawi.
Satish Upadhyay hian ram dang atanga kalte thlenna tur khualbbukah langur hram dan anga hram thiam mihring 30-40 vel an dah tih a sawi a, heng mite hi zawng an awm leh awm loh report-tu atan hman nghal an ni bawk.
Thuneitute hian zawngte ei tur an chhawp dawn tih an sawi a, hei hi a hmun bik tur an ruat bawk tih an sawi a, heng hmunah hian ei tur an zawna an pan khawm theih nana an tih a ni.
2010 Commonwealth Games an thlen tum pawh khan Delhi thuneitute hian zawng hnawt darh turin langur tak tak an hman bakah an hram dan anga hram thiam mihring an lo hmang tawh bawk.
Kum 2014 pawh khan langur enkawl thiam leh an hram anga hram thiamte chhawrin parliament leh sorkar hmun pawimawh atanga hnawt darh turin an ti.
Parliament thuneitute chuan a hma pawhin langur tak tak an lo hmang tawh a; mahse, ramsa humhalhtu pawlin hetiang ti tura man khawm chu nunrawnna an ti a, an lo sawisel tawh a ni.