MPCC President Lalsawta chuan thuneihna changa an sorkar chuan hleih leh hlauh, huat bik nei lovin sorkar an kalpui dawn niin a sawi.
MPCC-in nimin khan Lal Thanhawla Auditorium-a mi thar lawm luh inkhawm a hmanpuinaah Lalsawta chuan, Mizoram tana sorkar tha siam duh, Mizo hnam leh sakhaw humhim turin Congress party-ah mi thar an lawm lut zet chu lawmawm a tih thu a sawi a. Sorkar leh mipui hi kalphung pangngai ringawtin an kal thei tawh tih sawiin, “Thil tam tak tihdanglam a ngai a. Pathian leh mipuite zarah kan sorkar a nih chuan Mizoram hi mipuite beisei leh nghahhlelh angin kan her danglam dawn a ni,” a ti.
Lalsawta chuan Mizoram mipui 12,34,000 enkawl hi thil harsa a nih loh thu sawiin, “Ram hruaitute hian ramin kan dinhmun dik tak kan neih theihna turin a mawh kan phur. Sorkar atanga thla khat chhungin hmasawnna tam tak, kum nga chhung daih tur a thawh lawk theih a, thla khat chhung vek hian kum nga chhung pawha siam that theih loh pawi a sawi theih bawk,” tiin, Congress party an sorkar a nih chuan tumah hleih nei lo, hlauh leh huat bik nei lovin sorkar an kalpui dawn tih a sawi.
Kumin MLA inthlan lo awm tura Congress party manifesto pakhatna, ‘Tang Puihna leh sorkar tha’ tih chu Mizoram mamawh a nih thu sawiin Lalsawta chuan, “Mizo hi hnathawk hnam ni turin kan inbuatsaih a, kan inpeih tawh. Tang Puihna hmangin hnam ding chhuak kan ni ang a. Tang puihna hmangin a atang a piang kan pui dawn,” tiin, taimakna, thawhrimna te nen ram hi la siam that theih a nih thu a sawi.
Ringlomite hnena Mizote rawngbawlna pawhin nasa zawka rah a chhuah theihnan kumin MLA inthlanah sum hmanga tlin tumte tih beidawn a ngai tih sawiin, thla thum pawh tling tawh lovah hian vote hralh lo turin mipuite ngenin, “Rukru chuan a rawk tur a ngaihtuah thin a, keini hian min rawktu tur MLA kan thlang chhuak dawn em ni?” a ti a. Mi dik leh rinawm, ram siam that duh tak tak thlang chhuak turin Mizoram mipuite a sawm.
MPCC Vice President Lal Thanzara kaihhruai inkhawmah hian Congress president chuan an party-ah mi eng emaw zat a lawm lut a. A lawm luh zingah hian AMC Mayor hlui, PC Lalhmingthanga; AMC Councillor hlui, R. Lalbiakthanga; BJP Mizoram Vice President hlui, R. Vanramchhuanga leh BJP Mizoram Secretary lo ni tawh, P. Sanghmingthanga te tel a ni.