India chuan China-in tun hnaia an ram map a tihchhuah thara a ram chin a rin luh chu na takin an dodal tih an sawi.
Indian chanchinbute chuan map tharah hian hmarchhaka Arunachal Pradesh leh ram pahnihten an inchuh lai, Aksai Chin tlang chung zawl chu China-in a ram chinah a rin lut niin an tar lang.
Map thar hi Thawhtanni khan China-a natural resources ministry chuan a tichhuak a ni.
“Engmah tanchhan nei lova an rama an rin lut hi kan hnawl a ni,” tiin India-a foreign ministry thupuangtu, Arindam Bagchi chuan a sawi.
An chet dan chu China-in ‘ramria inrem lohna awm mekte chin fel dan a hriat chhun’ niin a sawi bawk.
Beijing chuan map chungchang leh India-in a duh lohna hi engmah a la sawi ve lo.
Indian Foreign Minister S Jaishankar pawh China-in a ram china a chhal chu ‘awm ang lo’ a tih thu a sawi.
“China hian tun hma pawhin a ram chin ni miah lo, mi rama mi a rama rin lutin map a lo tichhuak tawh thin a, hetiang hi chuan chin than a ni,” tiin TV channel NDTV hnenah Thawhlehni khan a sawi.
India-in China ram map thar a duh lohna a lantir hma lawk hian Prime Minister Narendra Modi leh Chinese President Xi Jinping te chu South Africa-a Brics summit neihnaah an inbia a. Indian thuneitu sang chuan ram pahnihte hian ramria an inrem lohna leh inmil lohnate dah thaa ‘buaina tireh zawnga kal’ tuma an inrem thu a lo sawi tawh.
India hian China-in a ram chin an ram anga rin luh a tumna leh luah a tumna hi a lo dang fo tawh thin.
Khawvel ram lian pahnihte hi km 3,440 zeta thui an inri a, an inrina hi Himalaya tlangdunga awm niin Line of Actual Control (LAC) an ti a. Ramri hi lui, dil leh vurin a khuh tlanga kal a nih nual hlawm avangin a chiang lovin ngaihdan pawh a inang lo hle.
Ram pahnih sipaite hi hmun eng emaw zatah an lo inep ut ut fo tawh thin a. December thla mai pawh khan Indian leh Chinese sipaite hi Tawang khaw bula ramri-ah an lo inep tawh nghe nghe.
China hian Arunachal Pradesh state pum hi an ram nia chhalin ‘South Tibet’ tiin a sawi thin a, hei hi India chuan a hnawl fithla thak a. India hian China-in a thunun, Himalaya tlangdunga Aksai Chin tlang chung zawl pawh a ram niin a chhal ve bawk.
April thla khan Delhi hian China-in Arunachal Pradesh-a hmun 11 lai hming thlak a tumna chu a lo hnawl tawh bawk a, ‘India ram bung leh a ram chhunga inrawlh’ tiin a sawi.
India leh China ram hnih inkar hi kum 2020-a Galwan phaikuam, Ladakh-a an sipaite an inphek sual atang khan a chhe zual a, hemi tuma an intibuai hi kum 1975 hnua an intihbuai nasat ber a ni.