Mizorama cham mek, Chief Election Commissioner Rajiv Kumar leh ECI hotu dangten nimin tlai khan Aijal Club-ah press conference an nei a, candidate-in campaign-na atana sum a hman theih zat chu Rs. nuai 28-ah tihpun a nih thu an sawi.
Chief Election Commissioner Kumar chuan Mizoram an thlen hnuah Mizorama political party hruaitute nen inkawmna an neih thu leh ngenna hrang hrang an hnenah an thlen thu a sawi a. Campaign senso tur zat tipung tura ngennate awm thu an sawi rualin zawhna chhangin candidate-in campaign-na atana sum a hman theih zat Rs nuai 20 ni thin chu Rs nuai 28 a nih tawh thu a sawi.
Kumar chuan kum upa leh rualbanlo harsatna neite chu an in atangin vote thlak phalsak an ni dawn tih a sawi a, hetihlai hian an in atanga vote thlak turte chuan dilna an theh luh a ngai dawn tih a sawi a. Zawhna chhangin Mizoram inthlanpui neih hun tur chu la tihchian a nih loh thu sawiin, political party-ten an ngen angin Inrinni leh Pathianniah vote thlak a nih a rinawm loh thu a sawi a ni.
Inthlanna thianglim, felfai, muanawm leh langtlang a awm theih nan theihtawp chhuah a nih tur thu sawiin, ramri kaltlanga zu, drugs leh pawisa te lak luh a nih lohna turin an strict dawn thu te, social media pawh uluk taka vil turin media cell din a ni dawn a, thu post-te vil a ni ang a, dan bawhchhiate chungah dan angin action lak zel a nih tur thu a sawi.
Chief Election Commissioner-in a sawi danin, tun dinhmunah Mizoramah vote nei mi nuai 8.38 an awm a, an zinga nuai 4.06 chu mipa niin, hmeichhia chu nuai 4.06 an ni a. Electoral roll revision neih mek a nih avangin MLA inthlan dawnah chuan vote nei zat hi a la danglam dawn tih a sawi.
Kumar chuan chanchinbumite chu mipui thlan sorkar din kawngah phak ang tawka tha thawh turin a sawm a, mipuite chu inthlanna kaihhnawiha tel ve ngei tura zirtir uar tur leh thuthang dik lo leh inbumna laka fihlim tum tura zirtir thin turin a chah bawk.
Mizoram pumah polling station 1276 a awm thu leh mi 657-in polling station pakhat intawm ang zel a nih thu sawi bawkin, station 95 chu hmeichhe hlangin an enkawl tur a nih thu a sawi bawk a ni.
Mizoram MLA inthlanpui neih tura inbuatsaihna kalpui mek thlithlaia Mizorama zin, Chief Election Commissioner Kumar leh a hote hian Thawhlehni khan Mizoram thlengin an thlen ni leh nimin khan Mizorama inthlan kaihhnawiha inhnamhnawih mi pawimawh tak takte an kawm.
Mizoram chhung district hrang hrang 11-a District Election Officer leh Superintendent of Police theuhte chu nimin khan ECI hotute hian an kawm a, district official-te chu tun aia vote thlak an tam zawk theih nana tan la tur te, a hmei a pa, thalai leh khawpuia chengten vote an thlak uar lehzual nana SVEEP Campaign leh district mila hmalak ngaih bikna laiah tan la turin a chah a ni.