Myanmar-a hel pawl pathum chuan sipai sorkarin anmahni duh lotute a that zel a nih chuan an bei let ve dawn tih an sawi a. Hetih lai hian Thailand ram chuan Myanmar atanga raltlana lutte damdawi mamawh lo pek a tum bawk.
Nimina Ta’ang National Liberation Army, Myanmar Nationalities Democratic Alliance Army leh Arakan Army (AA) pawlten thuchhuah intawm an siamah ‘sipaiten mipuite an that zel a nih chuan tanghovin kan do let dawn’ tiin an sawi.
Hel pawlten sipai sorkar an vau let thleng hian Assistance Association for Political Prisoners (AAPP) chuan February 1-a sipaiten thuneihna an chan atangin anmahni duh lotu mi 510 vel an that tawh tih an sawi a. Inrinni kha an thah tam ber ni niin mi 141 zet an that.
Sipai sorkar duh lotu mipui an thih tam zel lai hian Thawhtanni khan duh lohna lantir huaihawttu lian ber, General Strike Committee of Nationalities chuan open letter thawn chhuakin, dik lo taka sipaite an chetna chu chhang let turin hnam bil hel pawlte a sawm.
Thawhlehnia hel pawl pathumin thuchhuah an siamah pawh hian an kohna lam chu an awn hle tih a lang.
Sipai sorkar vautu pawl pathumte hian sorkar chu anmahni duh lotute nena inbiak theihna remchang siam tur leh dawhkan kilin, politics kalhmanga buaina chin fel tum turin an ti.
“Hetianga rawng taka pawisawi lo civil mite thah an ni hi pawmzam theih a ni lo,” tiin AA thupuangtu, Khine Thu Kha chuan Reuters hnenah audio message hmangin a sawi.
International Federation for Human Rights (FIDH)-a mi, Debbie Stothard-i chuan hel pawlten silai an chelek a nih vaih chuan tualchhung indona lian tak a chhuak thei dawn niin AFP hnenah a sawi.
Kum 1948-a Britain awpna lak atanga a zalen hnu atang khan Myanmar-ah hnam tlem zawk, chanvo tha chan duha helna hmanga bei pawl 24 vel an awm.
Heng pawlte hi sipaite nen hian an inbei fo thin a, chutih rual chuan hel pawla a chhiarte hi an list atangin an paih ve fo bawk a. AA ngawi pawh hi kumin kumtir mai khan firfiak pawl anga a chhalna atangin a paih.