Aizawl: Rural Development changtu, Minister Lalruatkima chuan nimin khan Joint YMA Field, Vairengtea phul lem phah a hawng.
Joint YMA Field, Vairengtea phul lem phah hi Special Assistance to State for Capital Investment (SASCI) hnuaia Rs nuai 600 hmanga phah a ni a. April 5, 2023 khan hna tan niin, August 23, 2023 khan thawh zawh a ni.
Phul lem phah hi metre 107-a thui, metre 68-a zau a ni.
Hawnna inkhawmah khuallian Lalruatkima chuan Mizo thalaiten hriselna leh infiamna kawng a hmasawnna an hmuh zel theih nan sports department hmalakna hrang hrang chu fakawm a tih thu a sawi a. Vairengte khuaa infiammite tana phul lem phah tharna khelmual changtlung tak hawn theih a buatsaih a ni chu lawmawm a tih thu a sawi.
Lalruatkima chuan harstana hrang hrang paltlang turin khawtlang, kohhran leh tlawmngai pawlte tanrual a pawimawh a. Mizorama hmasawnna thleng tur pawh hian tanrualna leh thawhhona tha neih a tul thu a sawi.
Infiamna lam a hmasawnna bakah rel hmanga inkalpawhna tha awm tur te, tuialhthei leh inchhunga hman LPG gas hnianghnar zawk chhekkhawl a nih theihna tur hmunhma ruahman te, buhfai dah khawlna tur FCI godown sak mek a nih thu leh inkalpawhna tha, 4-Lane siamna tur hna pawh tan thuai beisei a nih thu a sawi a. Kolasib district paltlangtu National Highway rang tak a thawm that a nih theih nan a enkawltu, NHIDCL hotute pawh ngun tak a hrilh an nih tawh thu a sawi bawk.
Inkhawmah hian khual zahawm, Serlui bialtu MLA Lalrinsanga Ralte pawhin thu a sawi a ni.