Aizawl : MPCC President Lalsawta chuan kumin MLA General Election ah ramin hma a sawn ngeina tur kawng an thlan a tul tih a sawi.
Thawhlehnia Mizoram Pradesh Mahila Congress Committee-in Lal Thanhawla Auditorium-a Aizawl City Block Mahila Zaipawl intihsiak a buatsaih hmanpuitu MPCC President chuan, mihring nuna hnam himna tur leh thih hnu piah lam ram thlenga thununtu sakhaw humhimna turin Congress Party chauh hi tuna kawng awmchhun a ni tih sawiin, “Sakhaw zalenna rawn duh thar vetu party dangte nen he thlarau indonaah hian hnehna chang turin Congress Party chuan hma a la zel dawn a ni,” a ti.
Lalsawta chuan Congress hmeichhe pawlin ram rorelna atan pawha hruaina hla tura an duh ber hla hmanga intihsiakna tha leh thianghlim an buatsaih chu tha a tih thu a sawi a. Mizo hmeichhe tumruh leh a ngaihna hriate hi ram ro hlu an nih thu leh hmeichhe thain ram leh hnam hmelhmang a thlak hlawk theih thu a sawi.
MPMCC President Vanlalawmpuii Chawngthu pawhin ram leh hnamin a mamawh chu nu tha leh hmeichhe tha an nih thu a sawi a. “Hmeichhiate hian hnam hmelhmang nasa takin a tha zawngin a ti danglam thei. Kan ram leh hnamin kawng dik a zawh theihna turin kan fate rilru pawh fimkhur takin kan thunun tur a ni,” a ti bawk.
Mahila Zaipawl intihsiakna hi Lalremsiami (Lapuii), Vice President, MPMCC in a kaihruai a ni.