Ligue 1 club AS Monaco chuan Arsenal atangin Pound maktaduai 35 in striker Folarin Balogun chu an lei fel.
Kum 22 mi United States striker hian season liamta a goal 22 a khungna league-ah a khel leh dawn a, Monaco hnenah hian kum nga contract a ziak.
Season hmasa a French club Reims tana che tha tak Balogun hian tun season tharah Arsenal striker Gabriel Jesus chu inhliam mahse inkhel hmachhawn tir a ni lova, chhuak tura ngaih a nihna a rei tawh.
Arsenal academy chhuak player hian kum 17 a nihin Gunners hnenah professional football contract a ziak a. Mahse senior team tan vawi hnih chiha a inkhel.
New York a piang Balogun aiah hian tun season-ah Mikel Arteta chuan Eddie Nketiah a ring zawk a, Inrinni zanah Leandro Trossard chu striker anga chhawr a ni bawk.
Arsenal chuan, “Folarin hi academy atanga first team thlengin Arsenal tana a inpeknaah kan lawm a, Monaco-ah bung thar a kaina atan duhsakna kan hlan.” tiin an thlah.
England tan age group hrang hrangah Under-21 team thleng a inlan kim vek a. Under-21 player rinrawl ni hman mahse senior team-ah United States tana inkhelh a thlang zawk a. USMNT tan vawi hnih inkhel tawhin 2023 CONCACAF Nations League final-ah goal a khung.