Aizawl: MPCC Spokesperson Dr Lallianchhunga chuan mi taima leh thawkrimte dinchhuahtir chu Congress party-in kumin MLA inthlanpui lo awm turah an manifesto pakhatna ‘Tang Puihna’-in a tum ber a nih thu a sawi.
Nimin khan Champhai MJA Press Club-a thu thar thehdarhtute a kawmnaah Dr Lallianchhunga chuan ‘Tang Puihna’ hnuaiah hian din chhuah ngei tuma tan lak tumte emaw, tan la mek tawhte, lo leh huan thlai neite, ran vulhtu te, sumdawnna bul tan duh leh bul tan tawh te, hmasawn zel duh te, sum harsatna avanga zirna chhunzawm kawnga harsatna tawk te leh lehkhazir chunga mahni intodelh tuma tan latu te pawh an mamawhna zawnah tak tanpuina Rs nuai 2 emaw, an mamawh dan azirin a aia tam pawh sorkarin an pe dawn tih a sawi.
Dr Lallianchhunga chuan ‘tang’ (tan latute) chu puih hmasak an ni phawt ang a, tang thiam lo emaw, tan nachang hre lo emaw, taksa leh rilru lama harsatna neih vanga tang thei lo thlengin sorkar chuan a tul angin hma an la dawn tih a sawi.
India rama sorkar sum leh pai enkawl dan thlak danglam a nih tawh avangin, sum leh pai enkawl thiam tan chuan tang puihna scheme tihlawhtling tura sum leh pai mamawh ang ang chu budget-a dah theih vek a nih thu sawiin, “Congress sorkar lai khan NEDP-ah Rs. vbc. 1,000-te kan lo dah tawh thin a; chuvangin, he ‘Tang Puihna’ tur pawh hi budget-ah cheng vaibelchhe tam tak dah kan tum a ni,” Dr Lallianchhunga’n a ti.
Tang Puihna chu sem policy a nih loh thu sawiin Congress thupuangtu chuan, “Tang puihnaah chuan a mamawh tak takte chauh tanpui an ni ang a, a mamawh lote hnenah pek a ni ve dawn lo a ni,” tiin, kum 2023 MLA inthlanah Congress Party-in sorkarna an siam a nih chuan chhungkaw tin, mi mal tinin nasa takin hma an sawn ngei dawn a. ‘Tang puihna’ hian Mizoram hmel hi a tha zawngin a tidanglam vek dawn niin a sawi.
Champhai South bial chhunga hmasawnna ruhrel (economics infrastructure) awm sate tihchangtluna hnathawk theia siam hi an hna hmasa tur a ni dawn tih a sawi a. Pathian leh mipui zarah thuneihna changa an sorkar a nih chuan, Champhai South tan chauh ni lo, Champhai district pumpui tana pa nih tling takin Congress chuan hma an la dawn tih a sawi.