Liverpool chuan German champion Bayern Munich hnen atangin midfielder Ryan Gravenberch lakluh dan chungchang sawiin inbiakna an nei.
Netherlands international hian nikum khan Ajax Amsterdam chhuahsanin Bayern Munich hi a zawm a, nimahsela Germany-ah a beisei angin first team football a khel hnem lo.
Kum 21 mi Gravenberch hian tun season-ah pawh substitute bench atanga vawikhat dah luh a nih bak inkhelh a la nei lo.
Tun nipuiah Liverpool nen hian sawizawm a ni reng tawh a, nimahsela Reds lam hian ngawrh taka indawrna kalpui an nei lo. India sana a naktuk zing dar 3:30 a player bazar a inkhar hma in a insawnna an tifel thei ang em tih erawh hriat a la ni lo.
Liverpool hian tun nipuiah an midfield tichak turin Alexis Mac Allister, Dominik Szoboszlai leh Wataru Endo te an lalut tawh.
Nimahsela midfielder pawimawh Jordan Henderson leh Fabinho te an chhuahtir bakah James Milner leh Naby Keita te contract a zawh tawh bawk avangin muallaiah duhthlan tur neih belh an duh a, hei vang hian Gravenberch hi an ngaihven.