Tunlai chu Aizawl khawlaiah thlai thar tha tak tak, man tlawm tak taka zawrh a tam hle a. A then phei chu a man a tlawm lutuk hi a chingtute hlawk loh turzia a lang sa reng mai a. An va khawngaihthlak thin tak em. Mangan hralh tih hriat reng maia an thlai thar man tlawm lutuka an hralh thin hian rilru a khawih a. Retheihna lak atanga chhuak a, intodelh ve tura an beiseina chu heti hian kumtin a thamral chu a ni mai a. Engtinnge maw kan ram thuneitute hian he harsatna hi an sutkian dawn le. Rilruah zawhna a lo lut zut zut thin.
Ram hausa leh changkangte angin he ram te tak te hi technology ah kan thang thut dawn rih lova. Kan thiamna in a pha mai dawn lo. Kan education kalphung pawhin a pha rih hek lo. Kan rama kan tharchhuah leh dehchhuahah hian kum tam tak kan la innghat dawn a. Kan dinhmun hi kan inhriat chian a, kan tih tur leh hmabak hi kan hriatchian a tha khawp mai. Thil sang leh changkang pui pui insawihmuh hi i sim teh ang u. Kan hotute hian oil li pui chungah kan lang tihte hi sawi sawi tul lo a ni. Heng hi kan innghahna tur ani rih lo.
Ram kan nei a. Kan hmang tangkai lova. Hmang tangkai tur hian kan hotute hian min kaihruai rih lo mai niin a lang. Thlai thar hi kan thiam lo tawp ani lova. A thar laiin tam tak kan thar a. Mahse, dahthat dan kan thiam lova. Dah thatna lam ngaihtuah turin kan sum dinhmunin a phak lo. Helai tak hi kan sawrkar lam mawhphurhna a ni. Mipui chuan a tharchhuah lam kan ti mai ang. Kumtluana kan innghahna ni turin kawng kan nei lo a ni. Tin, hralh theih tura han sawngbawl zui pawh hi kan sawi rei ta. Tih a awm silo. Sawrkarin thlai thar kan lei ang tih thawmte a awm a. Sawrkar hian thlai thar hmanga sum dawn a tum em ni. Sumdawng sawrkar hi khawi ramah mah an awm ngai lo. Sawrkar hi sumdawng tur ani lova. Mipui ten sumdawnna kawng an neih theih nana ruahmanna siam feltu tur, harsatna an neih a sukiangtu tur a ni.
Kan thlai tharte tiral a, sum a chantir tur hian market chain te hi sawrkar hian a ngaihtuah pui tur ani zawk a. Agriculture marketing hi mi ramah engtinnge an kalpui a. Tuten nge buaipui, a buaipuitute nen engtinnge link kan siam ang. Thlai thar hralhchhuah chu khawilai hmun atangin nge ni ang. A rate chungchangah sawrkarin mawh a phurh chuan thil buai a tam ang. A leitu leh a hralhtu inkara rate hi chu sawrkar mawhphurhna ani ngai lo. Mithiamten kalkawng an duan sa a mipui an kal theihna tura ngaihtuah theitu sawrkar hi kan mamawh ber ani zawk a. Chumi lam hawia min kalpui theitu sawrkar chu tu in nge siam dawn le. Hei hi kan kalkawng pawimawh hmasa a ni e.