Manipur-a Zohnahthlakte chenna, Khousabung leh a chhehvel khua Zohnahthlak leh Meitei inkahnaah Zohnahthlak mi pathum an thi a, boruak a lum chhoh zel avangin Lamka district chhungah emergency puan a ni.
Manipur atanga thudawn danin Thawhlehni atang khan Meitei-ten Zohnahthlakte chenna, Khousabung leh a chhehvel khuate chu beiin nasa takin inkahna a thleng a. Metei-te hian khaw dang – Lonphai, Kangvai leh Sugnu te an beih chhunzawm zel avangin Indigenous Tribal Leaders Forum (ITLF) chuan nimin atang khan Lamka district chhungah emergency an puang.
Tun hnaia hnam pahnih inbeihnaah hian Zohnahthlak mi pathumin nunna an chân a, hliam tuar eng emaw zat an awm bawk a. Nilani khan Metei commando leh an hel pawl, Arambai Tengngol-ten Khoirentak khua chu beiin, helai hmuna volunteer duty hla phuah thiam, hriat hlawh tak LS Mangbawi Lungdim chu a lu-ah kah hliam a ni.
Hliamna tak tuarin Lamka District Hospital-ah hruai a ni a, an khawih theih loh avangin Aizawla panpui a ni a, Songtal khua an thlenin a hliam tuar loin a boral ta a. Ani bakah hian Richard Hemkhoulin Guite pawh a boral bawk a ni.
LS Mangbawi-a fate pahnih hi an sahimna zawngin Khawzawla tlan lutin an awm mek a, elementary school-ah lutin a fa u zawk mipa chu pawl kaw zirlai niin, a naupang zawkin hmeichhiain pawl riat a zir mek a ni.
Inkahna nasat berna, Khousabung leh a chhehvel khuaahte hian Thawhlehni zing atanga nimin thleng khan silai ri a la reh lo a. Khousabung khaw hotute chuan chhun zan zawmin Metei-te nen an la inkap nasa hle tih an sawi a, inkahnaah hian P.Geljang khuaa volunteer duty Paokam Kipgen, kum 50, Koite khua chu kah hlum a nih thu an sawi bawk a ni.