Aam Aadmi Party (AAP), Mizoram chuan sorkarin jail a enkawl dan chu an duh loin tha an ti lo a, tun aia nasa zawka thuam tha turin sorkar an ngen.
AAP Mizoram hruaitute chuan nimin khan Aizawl Press Club-ah thuthar thehdarhtute an kawm a, State President ndrew Lalremkima chuan Mizorama jail-te zirchianna an nei a, chuta tanga an hmuh chhuahah chuan a tawt hle tih an hmu chhuak tih a sawi.
Andrew-a chuan Mizoram pumah jail 10 awmin tang awm thei zat chu mi 1,386 a nih laiin mi 2,125 an tang mek a, a bikin Central Jail, Central Women Jail bakah Aizawl, Lunglei leh Champhai district jail te a tawt zual tih sawiin, tuna tang mek zat atanga chhut chuan mihring 10 awmna turah mi 18 vel bawr zel dah lui ang a nih thu te, thawktute indaih lohna a nasa hle a, jail warder post ruak 90 a awm thu a sawi.
AAP state president chuan Mizorama jail lian ber, central jail leh district thenkhata jail-te chu a hmunhmate a chhe tawh hle tih sawi bawkin, sorkarin jail a enkawl dan mek chu tha lo an ti a, tun aia nasa zawka ngaihsak leh enkawl a ngaih thu a sawi bakah sorkar chu Mizorama jail-te thuam tha thuai turin an ngen tih a sawi bawk a ni.