Aizawl: ZPM Leader Lalduhoma chuan party dangte beihrawn hial ngai khawpa ZPM party a thang lian ta chu Pathian hnathawh a nih thu a sawi.
ZPM-in nimina Hnahthiala vantlang inkhawm an buatsaih hmanpuitu, Lalduhoma chuan khawvel ram ropui leh sorkar thiltithei ber berte pawh an tluchhe tawh thin a. Ram thar, sorkar thar ropui tak tak lo ding tawh thinin, Mizoramah ngei pawh ZPM party a vul chho mek tih hairual a nih loh thu a sawi a, “Sorkar tura rin, mipui ngaihdan hrang hrang lakkhawmna pawh ZPM chuan pakhatna dinhmun a hauh zel a. Party dangte beihrawn hial ngai khawpa ZPM party chu a lo thang lian ta chu Pathian hnathawh a ni tak zet a ni,” a ti.
Lalduhoma chuan thalaite hmasawn nan theihtawp an chhuah zel dawn tih sawiin, “ZPM vote kher a ngai lo titute hian an hre sual a ni. Inthlanpuia ZPM-a sorkar loh chuan ram mipuite hi kan dinhmun ngaiah kan ding leh ngei dawn a. Chuvangin, ZPM nih kher hi a ngai a, a tul em em bawk,” a ti a. ZPM chuan Mizoram zim tê hi Pathian chakna ringa an siam that theih ngei a rin thu a sawi.
He inkhawmah hian ZPM Southern Headquarters, Lunglei President Lalrinpuii leh ZPM South Tuipui bial viltu, Jeje Lalpekhlua ten thu an sawi ve bawk.